CYMA FOOTBALL YMA Branch ball pet thiam ber a hriat dawn
A hun a thleng ta. Vawiin hian CT Group Cup, CYMA Inter Barnch Football Tournament 2015 chu a hmawr an bawk dawn. Thingtlang inkhel thiam khua Lengpui leh Aizawl inkhel thiam veng Armed Veng ten Lammualah final an khel ang.
Tlai dar 3:30-ah closing function ṭan a ni ang a, chumi zawh chuan final khelh ṭan tur a ni. Final lut turin Lengpui hian goal 16 an khung a, goal ruk chauh an chhuah. Armed Vengin goal li chiah an chhuah a, goal 21 zet an khung. Record en mai chuan Armed Veng an ṭha zawk.
Mipui an phur
Lengpuiin semifinal-a Bawngkawn an hneh ṭumin Lammualah mipui an khat vek a, khawtlang hruaituten fan-te kalna tur ruahhmanna felfai tak an neih avangin final-ah pawh an tam leh ang. Armed Veng hi engtik lai maha fans nei tlem ngai lo an ni. Ṭhutna ṭha chang turin kal hma a fuh ang.
Hnuhma nei ṭha
Armed Veng hi CYMA Football-a hnuhma nei ṭha ber an ni. Final vawi riat an luh tawhah vawi li (1985, 2003, 2010 leh 2012) an champion a, a zawna vawi thum champion-na hun ṭha an nei a, kumina NECS Cup champion an ni.
An khingpui tur Lengpui hi kum 2006 khan an champion a, 2008-ah semifinal an thleng leh bawk. Aizawl khaw pawn aṭanga champion thei hmasa ber leh awmchhun an la ni.
Rohminga magic
Baza tlang bung hnuai aṭanga Rohminga inkhel en tawh chuan local football an ngaina chhunzawm ṭhin niin an sawi. Kum 2006-a Lengpui champion ṭum khan Lammual kha lei a la ni a, khaw diak karah pawh Shillong Lajong leh Aizawl FC te I League-a hruai thlengtu Rohminga hian a ball thiamna hmangin mipui mit a lo ti tlei tawh ṭhin a, Baza tluang bung tluk hnu leh Lammmual grass a nih hnuah pawh Rohminga hi a la thiam reng.
MPL1 best midfielder hian Round of 16-a Leitan an khelh ṭumin Lengpui team hi a rawn zawm a, goal a rawn khung nghal. Rohminga hi awm ta lo se Lengpui hian final na thleng kher lo ang, chutihrualin tlar hnunga veteran defender Thangliana leh JS Hmar te hming sawi hmaih a thiang lo a. Lengpui tana goal li khung tawhtu striker Lalremsanga hming sawi lan a ṭul bawk.
Armed Veng nge nge
Final boruakah chuan tawnhriat nei ṭha Armed Veng an duai lo ang. MPL3 best player Lalramchullova hi tun hnaiah chuan hriat a hlawh a, goal nga khung tawhtu Lalbiakhlua, William Lalnunfela, Lalfakzuala, Lalnghinglova, Zoremtluanga, Lalmuanzoa, Vanlalduatsanga, Lalruatsanga, B. Zoramthara leh Andrew Lalhmingliana te hi MPL tawnhriat nei vek an ni a. Simon Lalruatkima leh rawlthar duhawm Lalawmpuia Hnamte te hi MPL la khel si loah chuan final luhna kawngah an pawimawh takzet.
Eng nge an sawi?
Armed Veng coach Lalramchhuana Ralte chuan, "Kan khingpui tur Lengpui hi an inkhel kan lo en fo tawh a, team ṭha tak an nih avangin fimkhur takin kan khelh a ngai dawn. Kan fimkhur dawn a, mahse kan khelh dan phung pangngaiin goal khung tumin kan bei leh dawn a ni. Kawng thui tak kan zawh tawh avangin a tawp ṭhak thlengin kan bei ang. A zawna a vawi thum nan champion ngei kan tum," tiin a sawi.
Lengpui manager R. Thanngura chuan, "An sulhnu kan en chuan Armed Veng tluka hnuhma nei ṭha veng an awm lo ang. Mahse, kan tumruhna leh thawhrimna avangin tun hun hi ka thleng tawh a, vawiinah pawh hian chak ngei kan tum dawn. Kan tan chuan team ṭha leh player ṭha tak tak hmachhawn hi chona a nih avangin a phurawm zawk viau a ni," tiin Vanglaini palai a hrilh.