New York Cosmos leh Cantona buaina
Manchester United forward hlui Eric Cantona chun nikum lawka a chhuahsan USA lam club New York Cosmos chu dollar maktaduai khat chawi turin a khing. French footballer ropui ṭhin hian New York Cosmos chu a hlawh $961,290 bat sakah a puh a ni.
Kum 2011 khan Cantona hian Director of soccer ni turin New York Cosmos hi a zawm a, nikum khan London pub pakhatah photographer pakhat a hnek vanga man a nih hnuin a club hian an ban a ni.
Kum 48-a upa Cantona hian Manhattan federal court-ah a club hlui hi khingin a hlawh an pek tur an bat bakah 4% a pung chu chawi turin a khing a ni.
New York Cosmos hi kum 1970 chho a Brazilian footballer ropui Pele leh West Germany defender Franz Beckenbauer te khelhna ṭhin a ni. Kum 1985 khan club hi tihtawp a ni a, kum 2011-ah dinthar leh niin MLS hnuai chiah North American Soccer League-ah an khel mek.