I League A chung berah Mohun Bagan
Mohun Bagan-in Kolkata club zinga I League champion hmasa ber nih an tum zel a, Nilaini zan khan Royal Wahingdoh 2-0 a hnehin league hmahruaitu an ni.
Pathianni khan Bengaluru-in Salgaocar an hneh avangin pakhatnaah awm chho mah se ni thum hnuah Bagan an tho leh nghal. Club pahnih point hmuh zat a inang a, match hnih khelh tur a la awm a, season kharnaah champion lai Bengaluru leh Bagan hi an inkhel ang.
Barasat District Sports Stadium, Kolkata-ah Jeje Lalpekhlua chu Bagan tana bul ṭantu zingah a tel a, Wahingdoh starting XI-ah Lalchhawnkima leh Lallawmzuala te an awm a, second half-ah bench aṭangin Lalhmangaihsanga a lut bawk.
Tan aṭanga minute ngana lekah Jeje thawhrah chu Sony Norde chuan a hmang ṭangkai thei lo a, darkar chanve hnuah Balwant Singh-a ball pek ṭha tak chu Jeje-a'n a khung thei bik lo. Hemi inkarah hian Wahingdoh defender Lawma ball vawrh ṭha tak chu North Korean forward Seong Yong Kim-a'n goal-ah a chantir teuh hle.
Minute 36-naah Pritam Kotal-a'n Bagan goal hmahruai a khung a, inkhela chungnung hret Bagan-in minute 63-naah Norde hmangin goal hnihna an khung leh bawk. 2-0 in Bagan an chak.
I League aṭangin team pakhat an tla dawn a, parukna a awm Mumbai FC leh an hnuaia awm Sporting de Goa, Shillong Lajong, Dempo, Salgaocar leh Bharat FC chu tla thei vek an la ni.
Season chawhnu lama tla chiang mai tura lang Sporting de Goa-in Odafa Okalie chet ṭhat zarah a zawnin ṭum hnihin an chak tawh. Sporting hian Odafa goal hmanga Mohun Bagan an hneh hnuah Nilaini zan khan Shillong Lajong 2-1 in an hneh a, chakna goal hi Nigerian forward Odafa khung a ni.