Pietersen bannaa inrawlh lo Cook

England test cricket captain Alastair Cook chuan Kevin Pietersen chungchangah inrawlhna engmah a neih loh thu sawiin, selection board hnenah Pietersen ko nawn tawh lo tura hrilh anga an sawina chu a pha.

Nikum February-a England team aṭanga an ban Pietersen hi kumin tir lam khan county cricket-ah a khelh ṭhat phawt chuan ram tan koh a nih leh tur thu hrilh a ni a, tunhnaiah a team khelhna Surrey tan tirple century siam mah se England team-ah koh a nih tawh loh tur thu hrilh a ni leh si a ni.

Pietersen leh Cook te hian tunhma in boruak an lo nei tawh ṭhin a, England team aṭanga ban a nih tirh pawh khan Cook nena an inhmuhthiamloh hi chhan lian tak zingah a tel. Tunhnai boruakah pawh Cook hi a inrawlh nia sawi a ni a, mahse hei hi kum 30-a upa English batsman hian a pha nasa hle.

England ODI captain te pawh lo ni tawh Cook chuan, "KP chungchangah hian ka inrawlh lo hrim hrim a, hetiang thuthang hi engtia lo awm mai nge a nih pawh ka hrethiam lo. Player thlan leh thlan loh chungchangah player te rawn kan ni ngai lo a, chutianga awm reng pawh chu ka duh. England tan cricket game ṭha tak khelha hnehna chan hi ka duh ber chu a ni," tiin Pietersen chungchangah a inrawlh loh thu a sawi.