England Under-21 squad-ah Harry Kane

2015 European Under-21 Championship khel thei tur England squad puan a ni a, Tottenham striker Harry Kane chu telh a ni.

Kane bakah hian Premier League-a langsar West Brom striker Saido Berahino leh Burnley forward Danny Ings te telh an ni a, Manchester United full-back Luke Shaw erawh thlan a ni lo.

Gareth Southgate-a team hian match hnu­hnung 14-ah vawi 13 an chak a. Inelna hi June 17-30 inkarah Czech Republic-ah khelh a ni dawn a, England hi Italy, Portugal leh Sweden te nen group khatah an awm.

Squad puan hma hian Tottenham manager Mauricio Pochettino chuan Harry hi England tana khel lo tura a duh thu a lo sawi tawh.

Pochettino chuan, "Harry hi a chau lo a, mahse buaina awm thei chu Premier League leh Europa League season tluana a khelh chuan a chakna nasa takin an hmang dawn a, ngai awh leh a awlsam lo. Euro U21 Championship a khelh leh bawk chuan season thara ṭha taka khelh hi a harsa dawn, chawlh a mamawh ang," tiin a sawi, awmzia erawh a awm hmel loh hle.

England U21 manager Southgate chuan, "Rinkai ni chungin inelna kan hmachhawn dawn a, hlawhtlinna nei thei tura kan inbuatsaih hi a ṭul a ni," tiin player ṭha ber hruai a tum thu a sawi.

England defender hlui hian United defender Luke Shaw-a'n tel duh mah se a fit loh avanga a koh loh thu a sawi tel bawk.