Bangalore tan IPL final a hnai

Nilaini zan khan India Premier League eliminator round khelh a ni a, IPL table-a pathumna dinhmun hauhtu Royal Challengers Bangalore chuan plain Rajasthan Royals chu run 71 laiin an sawp.

Maharashtra Cricket Association Stadium, Pune-a inkhelah Bangalore tan AB de Villiers a parvul a, South Africa captain hian khawvel batsman ṭha zinga chhiar tel a nih chhan rawn tilangin ball 38 a hmachhawnah run 66 a vawchhuak a, a team tan a thawhhlawk hle.

Bangalore tan kum 23-a upa Punjabi tlangval Mandeep Singh a che ropui bawk a, India U19 vice-captain ṭhin hian ball 34 a hmachhawnah run 54 vawchhuakin a tawp thleng a dam.

Royal Challengers Bangalore-in over 20-ah run 180 an vawchhuak a, mi pali chiah an hloh. Inkhel boruak sang taka Rajasthan target hi a tam tham hle.

Rajasthan-in chak ngei tumin an target an um a, opener Ajinkya Rahane a rawn bat ṭha viau. India batsman hian ball 39 a hmachhawnah run 42 a vawchhuakin dinhmun duh-awm takah a team a hlangkai hman. Mahse kum 26-a upa batsman a out hnu hian batsman dang an che hleithei lo a, over 19 thleng chiah Rajasthan-in tlinin run 109 an vawchhuak a, mi sawm an hloh.

Chak phu zawk Bangalore an chak a, IPL final lut turin Qualifier 2-a Chennai Super Kings hneh chiah an mamawh ta. Rajasthan Royals tan erawh IPL nomawi chawi turin kum thar an nghah a ngai.

Qualifier 2 hi zanin dar 8:00-ah khelh a ni dawn a, JSCA International Stadium Complex, Ranchi-ah Royal Challengers Bangalore leh Qualifier 1-a chak lo Chennai Super Kings te an inkhel ang. A chak zawk zawkin Qualifier 1 a Chennai Super Kings hnehtu Mumbai Indians final-ah an tum ang.

Tun season IPL-a team hmuhnawm ber pawl Bangalore hi final lut turin an ṭha tawk. Captain atan India batsman ṭha ber pawl Virat Kohli an nei a, West Indies batsman ṭha Chris Gayle leh South Africa captain hial ni thei AB de Villiers an kawl bawk a, batting lamah chuan an ngaihtuahawm loh hle ang.

IPL table chung bera awm mek Chennai Super Kings batsman rual MS Dhoni, Brendon McCullum leh Suresh Raina te'n Bangalore bowling lama Mitchell Starc leh a naute ho hi an ngam dawn em? tih hi hmuh chakawm tak a ni bawk.