Maradona a tho leh ta: A hming chu Messi!

Khawvel footballer ropui bera mi tam takin an ngaih Diego Maradona chu November 25 khan a hahchawl ta a, mahse khawvelin Maradona thiam anga thiam erawh hmuh tur an la nei e. 

Pathianni zan La Liga inkhelah Barcelona chuan 4-0 in Osasuna an sawp a, Lionel Messi chuan goal ropui a khung - a goal khung hi Maradona tan a hlan zui.

Messi hian Maradona number (10) chuanna Newell's Old Boys jersey ha chungin van lam a hawi a, Argentine club hi Maradona lo khelh tawhna niin, Messi hi a naupan laiin he club tan hian a khel bawk. 

Barcelona tan Martin Braith-wwaite, Antoine Griezmann leh Philippe Coutinho-ten goal khat ṭheuh an khung ve bawk a, La Liga an match hnuhnung paruka an vawi khat chakna a ni. 

Nou Camp-a inkhelah Barcelona-in inkhel an thunun tluan chhuak zak a, minute 29-na lekah Dynamo Kiev laka goal hnih khung zo hlim Braithwwaite chuan goal hmahruai a khung. 

Barca-in inkhel an thunun chhunzawm a, Osasuna lamah an inkhel a ni ber - minute 42-na a ni a, Griezmann a inlar. French forward hian a thiam a la theihnghilh lo tih pholangin penalty box pawn aṭangin a volley goal. 

Kum 29 mi Griezmann-a'n tun season inelna hrang hrangah match 12 khelin goal li a khungna chauh a ni a, assist vawi hnih a nei tawh bawk - a lu chungah a kut dah chunga lamin a goal khung a lawm a, in lama inkhel lo entu a fanu tana a tih a ni.

Second half-a ni a, Barcelona-in an la duh tawk lo cheu. Tun season-a harhtharna chang Coutinho chuan a chunga rinna nghah chuan rin ngam a ni tih pholangin a khung ve leh a, 3-0 a ni. 

Barcelona-in goal thum an khung tawh a, Catalan club ṭantuten an duh ber erawh an la hmu lo - chu chu tun season-a beisei phak lo Messi-a goal khung lai a ni.

Minute 73-na a her chhuak a, fan-ten Messi tak tak an hmu ta. Argentine forward hian defender ven karah a duh thala ball khalhin a pet goal a, player thiam bik ke aṭanga chhuak tih loh rual a ni lo.

Messi hian tun season inelna hrang hrangah match 12 khelin goal sarih a khung a, assist pali a nei - heti chung hian tun season-ah a ṭhat dan berin a la khel lo a, Messi thiam falzia pholangtu a ni. 

Barcelona tan hian Ousmane Dembele chuan Messi goal khung hmain goal khung ve mah se offside vangin pawmsak a ni lo a, a tawpah 4-0 in Barca an chak. 

Season hmang ṭha lo tak Barcelona-in hnehna an chang a, mahse chu aia sawi hlawh zawk erawh Messi-a'n a goal khung Maradona tana a hlan leh a goal khung dan chu a ni. 

Braithwwaite-a'n goal a khung dawnin Messi hian a ban phar chhuakin, ben luh a tum a, Maradona hriatreng nan 'Hand of God' pholan a tum niin a lang. Mahse, Messi hian a goal dawn nia a lan avangin a kut a la thla a, 'Hand of God' kan hmu ta lo. 

Maradona-a'n FIFA World Cup 1986, quarterfinal-ah England lakah Hand of God hmangin goal a khung a, solo goal ropui hmangin an goal hnihna a khung zui. Messi-a'n 'Hand of God' a tih ṭhelh hnuin a mimal thawhrah hmangin goal a khung ve leh a, Maradona ngainatu tam takten Messi inkhel lai mittui nen an en ang tih a chiang. 

Barcelona tana season hnih lo khel tawh Diego Maradona khan Messi club hmasa ber Newell's Old Boys tan season khat (1993-94) a khel a, a match hmasa berah hian kum ruk mi Messi chu Diego inkhel entu zingah a tel. 

Messi hian inkhel a en a ni mai lo a, half time laiin khelmualah mipui en turin Newell's Old Boys hian ball an chawh kual tir. Maradona  jersey hak hnu hi a duhsaktuten Messi hnenah hian an pe a; Pathianni zana Osasuna laka goal-a khung hnua Messi-a'n Newell's Old Boys jersey-a hak kha Diego hak hnu ngei hi a ni.