Thih leh dam kara leng Liverpool

Premier League-a hnehna chang zo lo hlim Liverpool chu zanin dar 1:30-ah Champions League group stage match khel turin an inlan dawn a, Ajax an mikhual ang. 

Liverpool hian Champions League-a an match hmasa pathumah hnehna an chang a, mahse an match linaah Atalanta chu 2-0 a an ngam loh tak avangin Reds dinhmun hi a chhe sawt. Ajax leh zanin dar 1:30 veka  FC Midtjylland hmachhawn tur Atalanta ten point sarih ve ve an nei a, a chung berah point kua nen Liverpool an awm.

Reds hian match hnih an la hmabak aṭangin last 16 lut tur chuan point thum an hmuh a ngai dawn a, Ajax hmachhawn a awlsam dawn bawk si loh avangin Jurgen Klopp-a naute hi thih leh dam kara leng tiin sawi theih an ni. 

Liverpool boss Klopp-a'n Premier League fixture hautak vawi tam a sawisel a, Inrinni zana Brighton & Hove Albion an inhnehtawkpui zawh hnuah pawh BT Sport reporter nen an inchhang hial!

German coach-in a sawisel ṭhin ang chiahin, hahchawlhna hun nei mumal loin zanin dar 1:30-ah an inlan lehnghal dawn a, Klopp-a tan ruahmanna siam thiam a ngai ang. 

Ajax hian Dutch league lamah vawi khat chiah tlawm an la nei - tun season-ah match 10 khelin vawi kua an chak a, vawi khat an tlawm. Goal 42 ngawt an khung a, an lamah goal nga chiah a lut!

Eredivisie-a an match hnu-hnung berah Ajax hian 5-0 in FC Emmen an sawp a, goal khung an harsat loh laiin a ven lam an thiam tel bawk - Klopp leh a naute tan a harsa ang. 

Klopp-a'n fixture a hautak avangin fimkhur taka a naute a chhawr a ṭul tih a hria a, a player hliam neih dan en phei chuan fimkhur a ngai lehzual.

Reds hian hliam vangin Naby Keita, Joe Gomez, Virgil van Dijk, Xherdan Shaqiri, Trent Alexander-Arnold, Thiago Alcantara leh Alex Oxlade-Chamberlain an chhawr thei lo chiang. Brighton lakah tlarhnung leh midfield-a chhawr kawp theih James Milner a inhliam zui a, Klopp-a player chhawr theih loh rual en ila, chhiatpui tham takzet a ni. 

Ajax-in defender tawnhriat nei ṭha  Daley Blind an chhawr thei dawn lo tih loh chu buaina lian tham an nei lo a, Anfield-ah chak an tum ngam ang. 

Brighton lakah Klopp-a'n a defender Joel Matip chu bench-ah dahin a chawlh hahdamtir a, Cameroonian defender hian centre back-ah Rhys Williams a kawppui ang. Sadio Mane pawhin Brighton lakah bul a ṭan lo a, Mohamed Salah pawh inkhel bul ṭan mah se second half-ah lakchhuah a ni bawk - Klopp-a'n Ajax nena an inkhel tur a thlirlawk tih a hriat. 

Klopp-a'n hliam karah duhthlan tur Neco Williams, Curtis Jones, Kostas Tsimikas leh Divock Origi-te a nei a, mahse chil han ti put khawpa player ṭha erawh an awm lo. Liverpool tan an tlarhma pali bawk an pawimawh leh dawn a, Philippe Coutinho awm laia 'The Fabulous Four' ni ṭhin kha Diogo Jota-a'n a rawn tikim leh ta a, Roberto Firmino, Salah leh Mane nen Reds innghahna an ni ang.