MotoGP 2024 champion chu Jorge Martin

Tunah chuan Jorge Martin hun a thleng ve ta - Spanish rider hi khawvela bike intlansiakna sang berah a vawi khat nan a champion, amah tluk zotu reng an awm lo, a chung berah a awm.

Pathianni zan khan tun season atana MotoGP intlansiak hnuhnung ber Solidarity Barcelona MotoGP tlan a ni a - Martin hi pathumnaah a thleng, season tluana a point lo khawl khawm tawhsa nen champion nan a tawk.

Circuit de Barcelona-Catalunya-ah hian Francesco Bagnaia chu pakhatna a ni a, a tawp thlengin champion turin beiseina a nei. Mahse, point belhkhawmah Martin hi point 10 in a phak lo, nomawi a kawl lai a humhim thei ta lo a ni.

Intlansiak an ṭan hmain Bagnaia hian Martin a phak lohna chu point 19 a ni a, champion thei pahnih la awm mah se Martin tan champion turin pakhatna nih kher a ngai tawh lo, a mamawh tawk point a hlawh chhuak.

Bagnaia hi chak mah se Martin tan champion turin pakuana aia hniam loa thlen a tawk, a mamawh angin pathumnaah a thleng - season hmasa ang bawkin tunlai rider ṭha pahnihten champion nih an inchuh a ni.

Martin hun a thleng

Season hmasa pawh khan Martin leh Bagnaia te hi na takin an lo inum tawh, season kharna Valencia Grand Prix chu champion tur chinfelna tur a ni a, an pahnih hian champion thei ve ve an ni bawk.

Mahse, kum 2023 intlansiak hnuhnung berah Martin a chesual a, lap ruknaah Marc Marquez nen intipalhin, a elpui Bagnaia chu a vawi hnih nan a champion theih phah, thil thleng hi hmanni ang maiin an la hrechiang ang.

Tun season kharna pawh Valencia-ah bawk neih tur a ni a, mahse Spain rama tuilian vangin Barcelona lamah an sawn ta zawk, a inel na chu Martin leh Bagnaia bawk an ni leh, chetsual palh pawizia hrechiangtu an ni.

Season thara Aprilia zawm tur Martin a chesual duh tawh bik lo, pakhatna nih tuma beih chiam ai chuan a mamawh tawk point hlawh chhuah mai kha a him tih a hria a, season tluana nghelnghet thei taka a tlan theihna chu a tawpah a chhawr ta a ni.

Lawmna mittui

A suangtuah ṭhin chu a tak ram a chang ta a, a tan chuan awm dan thiam pawh a harsa ang. Ducati rider Martin chuan, "Eng thu ber nge ka sawi ang tih pawh ka hrethiam lo, thil thleng hi ka tan chuan a makin min barakhaih hle.

"Lap hnuhnung ber kan tlan lai phei kha chuan thil dang ka ngaihtuah nasa tawh a, chetsual mai pawh a hlauhawm zawk hial. Ka biangah mittui a rawn luang ṭan der tawh, bike intlansiakna sanga ka champion ve mai tur khan awmdan min tithiam lo.

"Zinkawng thui tak a ni a, chetsualna leh hliam tam tak ka paltlang. Tun season chhung ngei pawhin chesual leh inhliam an awm a, chung zingah chuan a vannei berah ka ṭang," tiin a sawi a, a tan chuan mumang ram a ni.

Kum 26 mi Jorge Martin chuan sawi zawmin, "Season hmasa khan hun remchang ka lo nei tawh a, mahse ka tihlawhtling thei lo. Nikum lama ka chetsualna aṭang khan thil tam tak ka zir chhuak a, season tluana chesual loa tlan theih hlutna pawh ka hmu," a ti.

Pahnihna Bagnaia

Tun season chhungin intlansiak vawi 20 an awm, chung zinga 11 tehmeuhah chuan Bagnaia hi a chak ber. Martin hi intlansiak pathum - Portuguese GP, French GP leh Indonesian GP-ah te chauh a chak, mahse a champion ta zawk si.

Intlansiak hnuhnung pathumah Bagnaia hi a chak vek a, mahse champion nan a tawk zo lo. Intlansiakah hian pakhatna chauh ni loin a hnunga awmten point an inhmuh sem ṭhin- Bagnaia hian hnehna a chan loh ṭumin point a hmu chhe ṭhin, a tawpah a tuar.

Italian rider Bagnaia chuan, "Tun season chu Martin tan a ni a, tun hun thlen hi a phu. Kum tluan maiin hnufual lai nei loin a tlan char char thei a, world champion nih hi a phuin ka lawmpui hle," tiin a elpui chu tluk lo mah se a lawmpui.

Season tharah pawh Bagnaia leh Martin te hi inel na leh tura ngaih an ni, tun season chawhnu lama rawn tho chhuak Marc Marquez a awm dawn bawk a, kum tharah chuan inelna hautak leh hmuhnawm zawk an chhawpchhuah theih a rinawm.