Mourinho leh a hoten Chelsea an chelh

Stamford Bridge-ah Chelsea leh Tottenham Hotspur te goal awm loin an inhnehtawk. Jose Mourinho-a'n a thiam dan takin a player a rem a, inkhel chawhnu lamah inkhel hmuhnawm thlir tur a awm tawh lo.

Spurs hi Liverpool nen point 21 hmuin goal difference hmangin hmahruaitu an ni a, Chelsea-in point 19 an hmu ve bawk. London club pahnih hi champion rinkai an ni ve ve.

Tottenham Hotspur-in cham-pion rinkai Manchester City meuh an hneh theih avangin an ṭha tih a chiang a, Chelsea thiamzia erawh sawi nawn a ngai tawh lo.

Inkhelh ṭantirh lamah mid-fielder chak ṭha Tanguy Ndombele a hmuhnawm a, a tharum chu Blues player tan beih tham a tling. Goal nawr kawngah Steven Bergwijn a ṭangkai bawk a, Son Heung-min leh Harry Kane te an awm bawk nen inkhel a entlak hle.

Chelsea keeper Edouard Mendy-a'n Spurs defender Serge Aurier ball pet kawh ṭha tak a dansak a, Steven Bergwijn-a'n a hun ṭha neih chu goal kham chungah a pet bawk. Blues lamin Hakim Ziyech leh Timo Werner te bul an ṭantir a, first half-ah Ziyech-a ball pass chu Werner-a'n ṭha zetin khung mah se offside vangin goal-ah pawm a ni lo.

First half-ah goal a lut lo a, second half-ah Spurs team dang daih an rawn lang. Mourinho-a'n goal nawr aiin goal venhim a ngai pawimawh tawh zawk a, goal zawnah vawi khatmah an pet tawh lo.

Amaherawhchu Portuguese manager tum a hlawhtlingah a ngaih theih a, attacking game hmuhnawm khel ṭhin Chelsea an dang chat. Swansea City aṭanga Spurs zawmtu defender Joe Rodon-a'n Premier League-a bul a ṭan hmasak berah a khel ṭha hle.

Spurs-in goal venhim tawp hnaah nei mah se an khingpui Chelsea an nih miau avangin keeper Hugo Lloris-a'n hna a nei. France international keeper Lloris hian Mason Mount-a goal khung tur chu a dansak a, substitute Olivier Giroud-a'n ball ṭha a hmu fuh chungin keeper zawnah chauh a pet theih avangin goal hmuh tur a awm lo.

Chelsea boss Frank Lampard chuan, "Kan beisei sa ang deuhin thil a thleng. Ball kan chang tam a, chak turin chance kan insiam. Counter attack khel ṭhin kan tum chungin tlarhnung lam pawh a phui ṭha a, Kane leh Son pawh chance kan siam lo," tiin an khelh danah a lungawi thu a sawi.

Tottenham boss Jose Mourinho chuan, "Team pahnihin risk kan la ngam lo a, tihsual pakhat a awm chuan hrem kan ni dawn tih kan hre chiang a ni," tiin a sawi. Spurs manager Mourinho chuan, "Joe Rodon hi Swansea tan a khel ṭhin a, Thiago Silva erawh kum tam tak chhung khawvela defender ṭha ber a ni. Hei hian team pahnih danglamna a sawifiah," tiin an khingpui a fak mawi thiam hle. Portuguese manager hian a player-te an lawm loh thu a sawi a, an rilru puthmang vanga a lawm thu a sawi tel bawk.

Champion chungchang sawiin Mourinho chuan, "Champion tur zawnnaah chuan sakawr pawh kan ni pha lo, pony (sakawr te chi) chauh kan ni e," tiin a sawi a, Lampard erawhin a pawmpui lo.

Chelsea boss Lampard chuan, "Table chung berah an awm a, Jose thlirna hi a dang a ni ang e. Keini hi champion rinkai kan nih chuan anni pawh champion rinkai tho an ni. Gareth Bale bench-ah an dah thei a, squad-ah  Dele Alli an dah lo," tiin a pu hlui chu a inngaitlawm mah mahah a ngai.

Champions League-ah Chelsea-in Nilaini zanah Sevilla an hmachhawn ang a, Inrinni zanah Leeds United nen an inkhel leh ang. Tottenham-in LASK chu Europa League group stage-ah Ningani zanah an hmachhawn ang a, Pathianni zanah North London derby-ah Arsenal an mikhual 

leh ang.