A thiam ho zingah Sinner chungnung

Jannik Sinner chuan Taylor Fritz hnehin a vawi khat nan ATP Finals nomawi a chawi, a thiam zual pariat inelna huangah hian Italian mi zinga champion thei hmasa ber a ni nghal bawk.

Pathianni zan khan Turin, Italy-ah final khelh niin, tualchhung tlangval Sinner hian a khingpui Fritz hi 6-4, 6-4 in a hneh a, nomawi nen season a khar, a tan kum ṭha bik tia sawi theih a ni nghal bawk ang.

Kum 23 mi Sinner hian tun season chhungin match 70 zetah hnehna a chang a, inelna neih zawk tak ATP Finals-ah hian set hloh miah loin a champion, kum 1986 khan Ivan Lendl chu set hloh loin a champion tawh, ani hnua hetiang ti leh thei hmasa ber a ni.

Australian Open leh US Open champion Sinner chuan, "Kan ramah ngei mai ka champion a ni a, a hlu danglam khawp mai. Italy-ah nomawi ka chawi vawi khatna a ni tel bawk a, engkim mai hi ka tana hun ruat vek ni berin a lang.

"Player ṭha tak tak hlir ka hmachhawn a, chuvangin ka thlirna aṭang chuan ATP Finals chu a level a sang hle a, tun hma lama sulhnu ṭha lo nei tawhte ropuina kha a takin ka hrethiam ve ta a ni," a ti.

Sinner hian season a hmang ṭha hle a, world ranking lamah a chung berah a awm tlang dawn bawk. Damdawi hman phal loh chungchangah boruak nei ve mah se an puhna a dik lo tia nemngheh a ni, hei vang hian season tawp lamah pawn lam boruak a ngaihtuah tel a ngaih phah.

World number 1 ni chungin season thar a ṭan ang a, nakkum January thla chawhnu lamah Australian Open nomawi a kawl lai humhim tumin Melbourne Park lam a pan dawn a ni, chumi hma chuan intuaihriam nan inelna tenau zawk a hmachhawn bawk ang.

Chak lo zawk Fritz tan pawh lawmna tur a awm tho. American tlangval hi tun kara world ranking tharah chuan palina a ni ta a, tennis a khelh ṭan tirh aṭanga a tawn san lai ber niin, beiseina sang tak nen kum thar a thlir thei dawn a ni.

Kum 27 mi Taylor Fritz chuan, "Ka tan chuan chawlhkar ṭha tak a ni a, kum tawp kharna duhawm tak a ni tel bawk. World number 5 ka nih tirh khan ka buai phah lo a, tunah ranking thar nei mah ila ka kal dan pangngaiin ka kal ang," a ti.

Mimal inelna season a zo rih a, tunah chuan ram leh ram mipa tennis team hmanga inelna Davis Cup an khel ang. Inelna ni November 19-24 chhung hian khelh tur a ni ang.