India nulate an chak kim

Asian Champions Trophy 2024 khelh laiah India nula hockey khel thiamte chu an group match pangaah an chak vek - vawiin tlai dar 4:45 hian Japan nen semifinal an khel chhunzawm leh nghal ang.

India hian Pathianni zan khan an group match hnuhnung ber an khel a, forward Deepika Sehrawat-i chuan penalty corner aṭangin goal hnih a khung a, goal khat dang chu Navneet Kaur khung niin Japan 3-0 in an hneh.

Group match vawi nga an khelhah India hi chak vekin table hmahruaitu an ni a, league round lama an hneh hnuhnung ber Japan hi palina ni chungin semifinal an lut ve bawk, pakhatna leh palina te hian final luh an inchuh leh dawn a ni.

India tan Lalremsiami Hmar a la inlan kim vek a, tun inelna neih laiah hian goal hnih a khung tawh. Mizo nula hi player pawimawh leh bul ṭantu zinga mi a ni ṭhin a, semifinal-ah pawh hmun pawimawh a chang leh ngei ang.

Kolasib nula Remsiami chuan, "Kan tum ang takin kan khel chhuak ṭhin a, semifinal-ah pawh hian kan game ang taka kan khel leh thei a nih chuan kan chak theih ka beisei, chutihrualin inkhelah chuan vanduai palh a awm thei bawk," tiin Vanglaini a hrilh.

Rajgir, Bihar-a inelna neih mekah hian semifinal lehlamah pahnihna China leh Malaysia ten an inhmachhawn dawn bawk. November 20, Nilaini tlai dar 4:45-ah tournament hmawr bawkna hi neih a ni ang.