A tawp nan Mizoram inlan dawn
78th National Football Championship for Santosh Trophy 2024-25-ah Mizoram tan beisei tur a awm tawh lo a, match hmasa pahnihah an tlawm ve ve avangin 2014 champion Mizoramin Santosh Trophy final an khel dawn lo.
Mahse, heti chung hian Mizoramin match khat khelh an la hmabak a, vawiin chawhma dar 9:00 hian Sikkim an hmachhawn dawn. Mizoramin beisei tur nei tawh lo mah se, chak nei loa haw an duh dawn lo a, mualpho zualpui khuh nan chak an tum dawn.
Santosh Trophy-ah Mizoram leh Sikkim-in chak an la neih loh ve ve avangin an tan final round luh beiseina a awm tawh lo a, mualpho lo turin an inkhel dawn a ni ber - tlai dar 4:00-ah Tripura leh Manipur an inkhel dawn bawk a, team pahnih hian final round hmun ruak pakhat an inchuh ang.
A thlawn mai maw
Nikum Santosh Trophy-ah Mizoramin semifinal an lut a, mahse, champion zui ta Services chu 2-1 in an ngam lo - kuminah a aia sang zawk thlen tumin Mizoram team an inbuatsaih a, 2014 hnua nomawi la chawi leh lo team hian Mizoramah ngei Santosh Trophy hawn leh an châk.
Mizoram team-in inbuatsaihna pawh an nei ṭha a, Mizoram Premier League khel zo hlim an nih bawk avangin player fitness a ṭha tel - player an inringtawk a, coaching staff thla a muang a, mahse, rinna leh a tak ram chu inthlau tak a ni.
Match hmasa berah Mizoram hian 4-1 in Tripura an ngam lo nghal a, Santosh Trophy-a Mizoram team muttuina tibuai phak ngai miah loin Mizoram min sawp hi fans tam takin 'mak' an ti a, beisei loh result a ni nghal phawt!
A dam thei lo
B. Malsawmzuala enkawlna hnuaiah Mizoram team an ṭang a, Tripura laka an tihsualte insiamṭhat tumin an inzir a, coach Sawmtea chuan, "Thawkrim tak kan ni a, theihtawp kan chhuah," tiin Vanglaini a hrilh hial a, thih leh dam karah an leng tih an hai lo.
Hei mai a ni lo. Tun hnaia Manipur tualchhung buaina avangin state pahnih fans inkarah ṭawngkam mawi lo tak taka inbeihna a thleng fo a, an inhal takzet - hetiang boruak karah hian nikum Santosh Trophy-ah team pahnih an intawng a, 4-1 in Manipur an chak.
Manipur fan-ten social media lamah Mizoram ṭantute nasa takin an deu zui a, tualchhung football ngainatuten Manipur laka phuba lak thuai thuai an châk. Mizoram ṭantute beisei aia hmain phuba lakna hun ṭha a her chhuak a, Santosh Trophy-ah group khatah state pahnih hi dah an ni.
A na asin
Mizoram fans tan Manipur hneh a, qualifier aṭanga petchhuah a, final round inhlansan aia duhthusam a awm lo. Chu chuan hliam a tuam dam ang a, rilru na a thawi dam ang a, ring fan awk awk chunga an thlir nuih let vena hun chu a herchhuahpui ang.
Mahse, Mizoramin Tripura an ngam lo nghal a, fans beiseina a chau. Manipur nen an intawng ta - F. Lallawmkima hmangin Mizoram nui hmasa zawk mah se, Manipur-in Shunjanthan Ragui leh Naoroibam Romen Singh hmangin an chhanglet a, 2-1 in an chak daih!
Mizoram hliamah Manipur-in chi an phul belh a, na ti taka an vial laiin rah hrual zui an ni. "Khua a dur reng dawn hleinem," tia inhnem bak tih theih a awm lo a, 'Nakkumah chuan...' tia nghah leh phawt a ngai ta.
A tawpna chu
Mizoram tana pawimawh ber chu a tawp khar ṭhat a ni ta - vawiin chawhma dar 9:00-ah Sikkim an hmachhawn dawn a, Mizo pa Stephan Tawnthansanga enkawl team hi an hneh a nih chuan group mawngphaha awm bik loin Tripura an thlah thei ang.
Muthi tlangval Stephan hi AFC A Licence nei coach niin, Services player hlui a ni a, inkhelh a chawlhsan hnuah goalkeeping leh assistant coach hna Services-ah vek hian a chelh tawh a, Air Force-ah Assistant Coach a ni tawh bawk.
Stephan-a'n Mizo player-te state dang coach aiin a hrechiang dawn a, hneh ngei a tum ang. Sikkim hian Pathianni tlai khan Tripura chu 0-0 in chelh mah se, Manipur-in match hmasa berah an sawp avangin beisei tur an nei tawh bik lo - Manipur leh Tripura an inkhel bawk ang a, Manipur tan final round lut turin draw a tawk a, Tripura tan chak a ngai thung.