Nations League-ah England invawrh sang

UEFA Nations League-a League B kheltu England-in season tharah chuan League A an khel ve leh tawh dawn - Pathianni zan khan Three Lions hian Republic of Ireland chu 5-0 ngawtin an sawp a, League A an invawrhkai.

England tan Harry Kane (penalty), Anthony Gordon, Conor Gallagher, substitute Jarrod Bowen leh Taylor Harwood-Bellis ten goal khat ṭheuh an khung a, hun tawp thlenga goal dang khungtu an awm loh avangin, 5-0 in England an chak.

Manager lailawk Lee Carsley kaihhruaina hnuaia match ruk an khelhah England-in match ngaah hnehna an chang a, January thlaa Three Lions enkawl ṭan tur Thomas Tuchel tan hna a awlsam lehzual sawt dawn tihna a ni.

Kha mah mah!

Wembley Stadium-a inkhelah first half chhungin England-in goal an khung miah lo a, mahni mualah an chak zo dawn lo em ni chu aw, tih mai turin an awm hman - mahse, chawlhlawk laiin Carsley hnen aṭangin thu ṭha an ngaithla a, second half-ah goal nga an khung!

Minute 51-naah Ireland defender Liam Scales-a'n Jude Bellingham a titlu a, a yellow card pahnihnna chawiin hnawhchhuah a ni a, penalty a chawi zui bawk. Penalty hi Kane chuan goal-ah a chantir a, 1-0 a ni.

England-in goal an khung a, player pakhatin an tam zawk bawk. Chak tur a chiang nghal tiin a sawi ngam a, he rinna nemnghet tur hian Anthony Gordon chuan minute 55-naah an goal hnihna a khung zui ve leh bawk.

Goal a sur

England tana Gordon-a goal khung hi a danglam hle - Newcastle United forward tan Three Lions jersey nena a goal khung hmasak ber a ni a, ram tana a match hmasa ber kheltu Tino Livramento-a corss aṭanga ball kal a ni.

Three Lions an phur laklawh - Gallagher chuan ram tana a goal hmasa ber khungin, an goal thumna a khung ve leh a, player 10-a khel Ireland tan tho leh tur chuan thilmak a thlen a ngai tih a chiang tawh.

England tan zan duhawm tih loh rual a ni lo. Jarrod Bowen leh Taylor Harwood-Bellis ten ram tana an goal hmasa ber an khung ve leh a, Southampton tana khel Harwood-Bellis hi Roy Keane-a fanu pasal hual niin, ram tana a match hmasa berah goal a khung nghal.

Kan lawm e

England tan Carsley-a'n manager hna a thawk ṭha takzet a, mahse, English FA-in Thomas Tuchel an lakluh tawh avangin England Under-21 coach nih chhunzawm turin a hna hmasa lamah a kir leh ang.

Three Lions tan Jude Bellingham a khel ṭha takzet a, tun season-a Real Madrid jersey nena beisei phak lo midfielder hian player thiam bik a nihzia Wembley-ah a pholang - penalty a hlawh chhuak a, England goal hnuhnung pahnih chu a assist a ni bawk.

England-in goal nga an khung zinga goal li chu ram tana goal la khung ngai lo player khung vek a ni a, zan chhinchhiahtlak inkhel a ni - Three Lions an chak a, season tharah chuan League A an khel dawn e.