GIG Motors Inter Village Football : Chhinga Vengin Durtlang Leitan an hneh

GIG Motors All Mizoram Inter Village Football Championship chu nimin khan khelmual pathum RG Stadium, Mualpui, 1st Bn MAP Ground, Armed Veng leh Chite Veng Playground-ah te khelh chhunzawm a ni leh ta a, inkhel ngaihven hlawhah Chhinga Veng chuan 4-3 in Durtlang Leitan an hneh.

RG Stadium, Mualpuia inkhelah team pahnih an intiat tawk a, an inngam tawn hle. Chhinga Vengin minute khatna lekah F. Lalnuntluanga hmangin goal hmahruai an khung a, Lalhmangaihsanga'n Leitan tan a sut.

Mahse, F. Lalnuntluanga leh R. Malsawmtluanga ten goal khung belhin, 3-1 in hma an hruai zui a, a tawpna erawh a la ni lo! Lalhmangaihsanga leh Lalneihmawia ten Leitan tan beiseina an siam ve leh a, 3-3 a ni hman - penalty pet ngai tur angin a lang hman a, mahse, hun tawp nan minute ruk chauh a awm tawh tihah, Chhinga Veng tan tawnhriat nei ṭha Ms-a'n a khung belh leh a, 4-3 in an chak.

Football veng langsar inlanah Chanmari-in round of 64 lut turin harsatna an tawk lo a, Samtlang chu 8-0 ngawtin 1st Bn MAP Ground-ah an sawp - Chanmari tan Michael Lalhruaitluanga chuan goal li ngawt a khung a, a team tan a thawhhlawk hle.

Inkhel ngaihven hlawh dangah Bethlehem chuan 4-1 in Luangmual an sawp. Luangmual tan Lalramchhuana'n minute lina lekah goal hmahruai khung mah se, ngam loh chala chil hnawm ang lek a ni a, Bethlehem hian Lalrotluanga, Laldintluanga, RL Andrew Vanlalchhuanga leh Lalrinawma hmangin an chhanglet a, an chak.

Durtlang pawhin Marcus Malsawmzuala goal hmangin Tanhril chu 1-0 in an hneh a, Thenzawl Jt VC-in 4-0 in Venghlui an sawp bawk - F. Lalhmangaihzuala'n hattrick a siam a, HT Malsawmdawngliana'n goal khat a thawh ve bawk a ni.

Inter Village Football hi vawiinah khelmual pathumah khelh chhunzawm tur a ni dawn a, round of 64 match khat khelh tur awmin, Chite Veng chuan an veng khelmualah football thiam khua Lengpui chu chawhnu dar 2:00-ah an mikhual ang.