Argentina tan chak ngei ngei a ngai

World Cup champion an ni a, Copa America champion an ni bawk - FIFA ranking thlir chuan a chung berah an awm bawk. Mahse, Lionel Messi leh a ṭhiante hi number 1 an nihna chu chân mai thei dinhmunah an ding.

Lionel Scaloni naute hian Nilaini zing dar 5:30 hian Peru an hmachhawn dawn - World Cup qualifier khelh laiah hian an tlawm emaw, an chak zo lo emaw a nih chuan world number 1 an nihna an hloh ang.

Tun dinhmunah Albiceleste hian point 1862.75 an nei mek, anmahnih hnaih bertu France (1859.79) aia an sanna chu point thum chauh a ni, pathumna Spain chuan an hnaih hle bawk.

Messi leh a ṭhiante hi an chak lo a nih chuan France chuan an rawn tlanpel nghal dawn a, Nations League lamah Spain chuan Switzerland an hneh a nih chuan pahnihnaah an chho bawk ang - Argentina hi pathumnaah an tlahniam daih thei tihna a ni.

Argentina leh Peru inkhelhna tur hmun hi La Bombonera, Buenos Aires a ni a, a hmunah mi 54,000 an lut thei ang. Tun hnaiah result an nei ṭha tawk lo a, an boruak vawrh kan theihna remchang ni tura ngaih a ni a, player bakah entu lamin ṭhahnem an ngai khawpin a rinawm.

Inkhel dangah Brazil leh Uruguay an inhmachhawn dawn. Marcelo Bielsa enkawlna hnuaiah Uruguay an indinthar leh mek a, an match hnuhnung berah team ṭha Colombia an hneh thei.

Uruguay tan Brazil hmachhawn erawh thil awlsam a ni dawn ngawt lo - world champion vawi nga ni tawh hi World Cup 2026 atana inbuatsaih ṭha an ni bawk a, an thiampuipa Neymar a la awm loh avangin Barcelona forward Raphinha chu an innghahna tur a ni ang.