Match 15 chak zawn Cavaliers

Cleveland Cavaliers chuan tun season an match khelh apiangah hnehna an chang zel - NBA regular season match 15 chhung chu an chak ta, hetiang anga season bul ṭan fuh thei team palina an ni nghal bawk.

Nimin zing inkhelah Cleveland hian Charlotte Hornets chu 128-114 in an hneh, an chak theih nan Darius Garland chuan point 25 a nei a, ani bakah hian point 24 neitu Ty Jerome a langsar viau bawk a ni.

Cavs hian player mala langsar tak, team dangin innghahna bik atan an hman thawm na tak ang kha an nei lem lo - team thawhhona ṭha leh ṭanrualna chu an thupui a ni a, tun ṭumah pawh hian an inpui tawn nasa hlawm hle.

An chak theih nana point 21 neitu Jarrett Allen chuan, "Player zawng zawng hian Cleveland tana khel an ni tih kan hrechiang a, a hlutna leh pawimawhna kan hrechiang em em bawk.

"Kan tan chuan Cleveland hi thil hlu bik a ni a, kan theihtawp kan hlan ṭhin hi a mak lo. Match kan khel dawn tih kan hriat hi chuan phur leh thatho takin, nuamti takin court chhungah kan lut mai ṭhin," a ti.

Washington Capitols (1949) leh Houston Rockets (1994) te chuan tun hmain season tir lam an match 15 chhung hnehna an lo chang tawh a, kum 2016 khan Golden State Warriors chu ṭum 24 ngawt an lo chak zawn tawh bawk.

Tun hma lama sulhnu nei ṭha pathum hian NBA Finals an lut zui vek a, kumina an hnung zuitu Cleveland Cavaliers hian eng chen nge an thlen ve theih tih chu khawvelin a lo thlir dawn a ni.