Belgium an tlawm leh ta!

Real Madrid goalkeeper Thibaut Courtois-a'n Belgium-in coach Domenico Tedesco an ban hma chu ram tana inlan a tum loh thu a sawi tawh a, hetiang boruak karah hian Belgium-in result an nei ṭha thei lo - Pathianni zan khan UEFA Nations League-ah 1-0 in Israel an ngam lo.

Israel ram chhung buaina avangin Israel-in an home match chu Bozsik Arena, Budapest, Hungary-ah an khel a, khawthlang media-te tarlan dan chuan he inkhel ticket hi 600 chauh hralh a ni! A hmunah inkhel entu an tam lo hle.

Kum 25 mi Yarden Shua chuan ram tana a match hmasa berah goal a khung nghal a, Belgium hi 1-0 in an hneh. Budapest khawpuia chhum zing chhah tak karah inkhel a hmuhnawm tawk lo a, en a harsa takzet!

Belgium tan Arsenal forward Leandro Trossard chuan chance duhawm vawi hnih ngawt nei mah se, Israel goalkeeper Daniel Peretz chuan ṭha zetin a dansak ve ve a, Johan Bakayoko chuan uiawm takin a hlah bawk.

Mahse, hun tawp nan minute li chauh a awm tawh tihah Shua chuan inkhela goal awmchhun a khung ta nge nge a, an chak. Israel hian goal dang khungna remchang pawh an nei a, mahse, Eli Dasa chuan post pet perin, Dor Peretz-a chance neih chu Courtois-a tihtauh zara si ban nghaktu Koen Casteels chuan ṭha zetin a dang bawk - an chakna erawh a dal phah lo.

Hetihrual hian Israel hian League A Group 2 mawngphah luahin an relegate ta tho a, season tharah chuan League B an khel tawh ang.

Israel hian him turin Belgium lakah hian 3-0 tala chak an mamawh a, mahse, an beisei ang result an neih theih tak loh avangin an relegate - team pahnih hian point li ve ve an nei a, head-to-head goal difference hmangin Belgium an sang zawk.

Hetihrual hian Belgium pawh hi tla thlei dinhmunah an la ding tho. Nakkum March-ah relegation playoff an khel dawn a, League B aṭanga group runner up nen an inhmachhawn dawn a ni.