France-in Italy an ngam

UEFA Nations League-ah France chuan 3-1 in Italy an hneh a, League A Group 3-ah hmahruaitu dinhmun an luah chiang - ram pahnih hi quarterfinal lut tawh saa inkhel an ni a, mahse, France an chak avangin group hmahruaitu an ni.

Les Bleus hi quarterfinal-ah seeded an ni dawn tihna a ni a, result hlu tak a ni. France hian Italy khelmualah goal khung turin hun an mamawh rei lo - minute hnihna lekah Adrien Rabiot chuan Lucas Digne corner aṭanga ball kal chu a tauh lut.

France vanneih a kaltluang zui. Aston Villa defender Digne-a free kick pet chuan crossbar a per hnuah Italy goalkeeper Guglielmo Vicario per ve lehin, goal-ah a lut daih a, 2-0 a ni fel der.

Mahse, Azzurri an talbuai duh bik lo. Minute 35-naah Andrea Cambiaso chuan si phurh sut ṭhenna goal a khung a, a team ben harh nan erawh a tawk zo lo niin a lang - minute 65-naah Rabiot bawk inlarin an goal thumna a khung leh a, France an chak zui.

France tan Digne-a'n goal khung lo mah se, an goal khung pathumah a inrawlh vek a, Italy lakah Villa defender hi a tal 'hiar' hle.

September thla khan Parc des Princes-ah Italy hian 3-1 in France hi an lo hneh tawh a, anmahni buzawlah ngei France-in an hneh let ve ta thung. France keeper Mike Maignan chuan, "Phuba lak tumin he hmun hi kan pan a, kan muala Italy kan ngam loh khan mi ti na em a ni," a ti a, chak duha an tuihal thu a sawi.

France coach Didier Deschamps chuan, "Kan squad en ila, player naupang tak tak an ni hlawm - player tam zawk enchhin kha ka duh a, mahni inringtawk tak Italy ngei kha an mualah kan hneh a, kan khel ṭha takzet a ni," a ti - tunah chuan nakkuma khelh tur quarterfinal atan rilru a seng thei tawh ang.