China ramah India badminton thiam te

China Masters Super 750 badminton tournament chu vawiin aṭangin khelh ṭan a ni dawn a, inelna hmachhawn tur hian India player ṭhate an feh chhuak a ni.

Season hmang ṭha lo PV Sindhu leh Lakshya Sen te tan insiamṭhat theihna remchang a ni tura beisei a ni, anni pahnih hi Paris Olympic an khelh zawh hnu khan rei tak an chawl a, tun hnai khan inkhel ve leh mah se beisei an phak rih lo.

Sindhu leh Sen-a te baka mipui ngaihven chu Satwiksairaj Rankireddy leh Chirag Shetty te inkawp an ni ang. Mipa doubles world number 1 hluite hi tun hnaiah a inkhel lo rei ta hle - dar hliam vangin Satwik a inkhel thei lo reng a ni.

Paris Olympic hnuah Arctic Open, Denmark Open leh China Open te an khel thei lo a, an inkhelh loh rei avangin an ranking pawhin a tuar, tunah chuan hma lam pan an tum leh tawh ang.