Pathianni zanah Premier League a ṭiak dawn
Premier League-ah Chelsea an champion chiang tawh a, Champions League khel tur a chiang tawh a, Queens Park Rangers leh Burnley an tla chiang tawh.
Transfer boruak san dan aṭanga thlir phei chuan Premier League tawp dan tur hian beisei a pha lo a, Chelsea ṭantu tan erawh an club ṭan berin nomawi an chawi lai thlir chu hmaih phal chi a ni lo.
Chelsea-in an mualah Sunderland an khel dawn a, Jose Mourinho-a'n nomawi chawi chiang tawh mah se chak ngei a duh ang.
Portuguese manager hian Chelsea hi tun season-ah League Cup leh League-ah a champion pui a, Premier League manager of the season a thlan a ni. Chelsea player pawimawh Eden Hazard chu Professional Footballers' Association leh Football Writers' Association player of the year atana thlan a nih hnuah Premier League player of the year a thlan a ni leh bawk.
Europa League khel tur?
Pangana leh paruknain Europa League an khel thei dawn a, Liverpool (62 Pts), Tottenham Hotspurs (61 Pts) leh Southampton (60 Pts) te hi hmunruak pahnih inchuh tur chu an ni.
Pasarihnaa awm mek Saints hi an vannei thei bawk. FA Cup final-a Arsenal-in Aston Villa an hneh chuan pasarihna hi Europa Leauge khel tur an ni.
Relegation Battle
Season tharah Hull City emaw Newcastle United emaw kan hmu tawh dawn lo.
Newcastle hi him mai tura ngaih an ni nachungin tun hnaia an record thlirin beisei san vak an har hle. Match hnuhnung 10-a vawi kaw chak lo Newcastle hian West Ham an mikhual dawn.
Newcastle manager lai lawk John Carver chuan, "Club chhung buaina chu engpawhni rawh se, tunkar tawpah chuan Premier League kan khelh zel theih nan supporter puihna kan mamawh lehzual a ni. Kan hmabak khirh tak hi kan paltlang ngei a ngai a ni," tiin Hull result-a innghah loh a duh thu a sawi.
Hull City-in Manchester United an mikhual dawn a, Hull manager Steve Bruce hian kum kaw chhung Manchester United tan a khel tawh a, manager a nih hnuin a club hlui hi a la hneh lo.
Bruce chuan, "Manchester United hi kan hneh ngei a ṭul a, kum 17 chhung manager hna ka chelh hnua a ka la tih ngai loh a ni. United vang hian ka khup, mawngbawr leh ngal rek te ka ti na tawh a, ka chungah hian bat an nei a ni," tiin chak an mamawh thu a sawi a, a club hlui chu an theihna zawng zawnga khel lo turin a duh tel bawk.
Judgement day thlirlawkna tlangpui
Burnley leh Queens Park Rangers te an tla tawh.
Newcastle United leh Hull City te tla thei dinhmunah an ding.
Hull-in palina dinhmun hauh chiang tawh Manchester United an lo mikhual ang a, Newcastle-in an mualah West Ham an hmachhawn ang.
Steve Bruce enkawl Hull-in chak ngei ngei an mamawh a, chutihrualin Newcastle an chak chuan Hull hi an tla tho ang.
Newcastle an in draw a, Hull an chak erawh chuan goal difference hmangin Magpies an relegate ang.
Hull hi an match hnuhnung pathumah an chak lo vek a, Newcastle-in point 30 hmuh theih turah point khat chiah an hmu ve bawk.
Pathianni Zan Fixtures
Arsenal 7:30 PM West Brom
Aston Villa 7:30 PM Burnley
Chelsea 7:30 PM Sunderland
Crystal Palace 7:30 PM Swansea City
Everton 7:30 PM Tottenham Hotspur
Hull City 7:30 PM Manchester United
Leicester City 7:30 PM QPR
Manchester City 7:30 PM Southampton
Newcastle United 7:30 PM West Ham United
Stoke City 7:30 PM Liverpool