French Open an ṭan dawn ta

May 24 aṭanga June 7 thleng khelh tur French Open hi Paris, Stade Roland Garros a khel ṭhin a ni a, khawvela clay court Grand Slam tournament awmchhun a ni. Season khat chhunga grand slam pahnihna niin Australian Open dawtah khelh a ni ṭhin.

French Open zawh hian Wimbledon leh US Open te khelh leh ṭhin a ni bawk. Grand Slam dang pathum Australian, US leh Wimbledon-te hi chu Thawhṭanni aṭanga khelh ṭan ṭhin a ni a, French Open chauh hi Pathianni aṭanga khelh ṭan awmchhun a ni.

French Open hi nipui laia khelh ṭhin clay court tournament hnuhnung ber a ni bawk a. Grand Slam Tournament dangte ang lo takin chhun nisa a khelh vek ṭhin a ni. Fur lai a nih avangin ruah­surin a tibuai zauh zauh bawk.

Hmanlai chuan

Kum 1891 khan he tour­nament hi neih ṭan a ni a, a tirah chuan mipa tan chauh an buatsaih a, champion hmasa ber chu H. Briggs-a a ni. Kum 1897 aṭang khan hmeichhia an tel ṭanin champion hmasa ber chu French tennis player Adine Masson-i a ni thung.

Tournament ṭan aṭanga kum 34 chhung chu French mite tan chauh a tel theih. Kum 1925 khan tournament huam chin ti zauin ram dang mite tan pawh a tel ve theih ta. A tirah chuan he tournament hi Paris a tennis court hrang hrangah khelh kual ṭhin a ni. Kum 1928 aṭang khan khelhna bik neiin Stade Roland Garros-ah khel ṭhin a ni ta.

An inkhelhna stadium hi kum 1888 October 6 a piang French pilot Roland Garros a hming chawia sak a ni a, ani hi Indopui 1 naah khan kum 29 mi chauh niin Thlawhtheihnana chesualah a thi. Khawvela Thlawhtheihna kahthlak a thi hmasa ber a ni nghe nghe.

Indopui pahnihna avang khan kum 1940 aṭanga 1945 chhung khan he tournament hi an khel thei lo a, indopui reh hnu kum 1946-ah khelh chhunzawm leh niin hemi kum hian French player Marcel Bernard-a chu a champion. Kum 1983-a Yannick Noah a champion kha a ram leilungfa an champion-na hmasa ber a nih avangin tun thlengin French mipuite thinlungah ala thi thei lo.