Formula 1 Pathianniah Monaco Grand Prix

Formula 1 intlansiak chu Europe-ah neih chhunzawm zel a ni a, Pathianni khian France ramah Monaco Grand Prix an tlan leh ang. An intlansiakna tur tlang kawng Circuit de Monaco-ah hian kum 1929 aṭangin motor intlansiak an lo nei ṭan tawh a, mah se World Championship chu kum 1950 aṭanga neih a ni.

Circuit de Monaco-ah hian kawng­kawi ulh tak tak a tam avangin intlan­siak a harsa a, ngaihven a hlawh ṭhin hle. Kuminah pawh hian chanchin ngaihnawm tak tak a thleng leh lo ang tih sawi a har. An tlanna kawng hi 260.286 km a sei niin lap 78 an tlan ṭhin. He hmunah hian vawi 72 zet chu an lo intlansiak tawh a, driver hnehna chang hem ber tawh chu Brazilian Ayrton Senna niin vawi ruk hnehna a chang tawh. Nikum khan helai hmunah hian Mercedes an che ṭha hle. An driver Nico Rosberg chu pakhatna a ni a, a teammate Lewis Hamilton chu pahnihna a ni.

Tun Pathianni a intlansiak lo awm turah pawh hian Mercedes driver pahnihte bawk hi che ṭha leh tura beisei an ni. Intlansiak hnuhnung ber Spanish Grand Prix-ah khan Rosberg hi pakhatna niin Hamilton hi pahnihna a ni a, anni pahnih tho hi World cham­pionship-ah pawh hmahruaitu an ni. Hamilton hian point 111 hmu tawhin hma a hruai mek a, pahnihnaah Rosberg hi awmin point 20-in an inthlau mek.

World champion nilai leh tun sea­son-a hmahruai mektu Mercedes driver Hamilton hi chak tura rinkai a ni. English driver hian practice-naah vawi hnih an tlanchhinah pakhatna a ni leh ve ve. He­tih­lai hian Hamilton-a teammate Rosberg hi a kum zawnin vawi hnih pakhatna a nih tawh avangin ngaih thah theih a ni lo.

Ferrari team-in hmasawn zel an in beisei a, test drive-ah an driver pahnih Sebastian Vettel leh Kimi Raikkonen te chu pathumna leh palina an ni. France-ah hian Ferrari hian sulhnu an nei che lem lo hle a, an team hian construction-ah vawi kua hnehna chang tawhin an tluk loh awmchhun chu vawi 15 hnehna chang tawhtu McLaren chauh an ni.