Real Madrid coach thar tur Benitez?

Napoli manager Rafael Benitez chu season thara Real Madrid manager tura sawi rik a ni a, thuchiang a la awm lo nachungin a thleng dik theihna kawng a tam hle.

Real Madrid manager nilai Carlo Ancelotti hi zanina Getafe an hma­chhawn zawh chuan Real enkawl hna hi a chawlhsan tawh dawn niin Spanish chanchinbu lian Marca chuan a tarlang.

Dawhtheihna nei lo

Real Madrid-in an duh ang result an neih loh chuan manager an ban leh mai ṭhin. 2002–03 season khan Spanish manager Vicente del Bosque chuan Real hi La Liga-ah a champion pui a, amaherawhchu Champions League an champion loh vangin an ban. Del Bosque record hi a chhe lo a, Real hi La Liga ṭum hnih a champion pui bakah Champions League-ah vawi hnih an champion a, chuti chung chuan Real thuneituten Del Bosque chungah hian zahngaihna an lantir lo.

Del Bosque chhuah hnuah Real-in mana­ger sawmpakhat an nei tawh a, daih rei tak an awm lo. La Liga champion puitu Fabio Capello leh Bernd Schuster te pawhin kum khat chiah an daih. Tun season-a Chelsea champon puitu Jose Mourinho hi Del Bosque hnua daih rei ber niin kum thum chhung a enkawl a - La Liga, Copa del Rey leh Supercopa de Espana-ah vawi khat ṭheuh a champion pui.

Manager 11-na Ancelotti-a'n Mourinho rawn thlakin bul a ṭan ṭha hle. Season khatnaah Copa del Rey, UEFA Champions League, UEFA Super Cup leh FIFA Club World Cup-ah te a champion pui nghal. Amaherawhchu tun season chawhnu lama an chet chhiat avangin Real-in nomawi an chawi lo a, a hna a chan phah dawn niin a lang.

Benitez chu tunge?

Kum 55-a upa Benitez hi Italian club Napoli manager nilai a ni a, a contract neih lai hi thla thar khian a tawp ang. Real leh Spanish manager hi an indawr ṭan tawh niin an tarlang.

West Ham lam pawhin Sam Allardyce thlak turin Liverpool manager hlui hi an dawr a, amaherawhchu Benitez hian sawmna pahnih inkara a thlan tur a chiang hle.

Benitez hi Real-ah mithar a ni lo a, a inkhelh hun laiin defender a ni a, Real Madrid Castilla (Reserve Team) tan match 247 zet a khel a, goal sarih a khung.

Hemi hnu hian Parla leh Linares tan a khel leh a, player ṭha tak chu a ni lo.

Kum 1993 khan manager hna a chelh ṭan a, a enkawl hmasak ber pawh Real Madrid B a ni. Hemi hnu hian Valladolid, Osasuna, Extremadura, Tenerife, Valencia, Liverpool, Inter Milan, Chelsea leh Napoli a enkawl a. Inelna lian tham FIFA Club World Cup, UEFA Champions League, UEFA Europa League, La Liga, FA Cup leh Coppa Italia-ah a team enkawl a champion pui tawh a, UEFA Manager of the Year-ah ṭum hnih thlan a ni tawh bawk.

Benitez-a agent García Quilon chuan, "Rafa hi Real player hlui a ni a, Real Madrid B a enkawl tawh bawk. Mi rilru chhiar thiam tak ni lo mah ila Real Madrid enkawl hi chu a duh ngei ang," tiin Real an hnar loh tur thu a sawi.

Rafa a chiang?

Pawisa thapna lamah pawh Rafael Benitez hi Real enkawl tura rin ber a ni. Rafa hi Real manager tura pawisa thap tan chuan Re 1 dahin Rs 1.45 chauhin a pung ang. Chumi awmzia chu a thlen dik theihna a tam hle tihna a ni. Pawisa thapnaah hian Jose Mourinho hming pawh tarlan a ni a, ani erawh a thlen dik chuan Re 1 dah zelah Rs 101 a dawn theih a, a thleng dik lo ang.

Marca.com poll-ah erawh Ancelotti thlak turin Borussia Dortmund coach Jurgen Klopp an duh ber a, German manager hian vote lut aṭanga 44% vote a hmu. Hetihlai hian manager tura rinkai Rafa erawh panganaah a awm chauh a, 8.9% vote a hmu pha ṭawk.