England squad-ah Vardy leh Austin

June thla khian England-in Republic of Ireland leh Slovenia an khel dawn a, manager Roy Hodgson chuan player 24 awmna squad-ah Leicester forward Jamie Vardy leh QPR striker Charlie Austin a telh a, Euro U21 Championship khel tur Harry Kane a tel lo.

England hian match kaw chhung hneh loh an tawng tawh lo a, June 6 khian Dublin-ah Republic of Ireland nen friendly match an khel anga, hemi zawh hian Euro 2016 qualifier-ah Slovenia an hmachhawn ang.

England hi Euro 2016 qualifier Group E hmahruaitu an ni a, match nga khelh tawhah an la chak vek. An khingpui tur Slovenia hi pahnihnaah awmin point kua an hmu tawh thung.

England manager Hodgson chuan, "Austin hi kan enthlakna a rei tawh a, training-naah a tih theih ang te hmuh a ngai ang. Chutihrualin a khelh ngei erawh ka tiam thei lo. Vardy hi a tlan chak a, belh­chian lehzual hi ka duh a ni," tiin a sawi.

Leicester forward Vardy hian Chel­sea player Eden Hazard nen open play aṭanga an assists neih zat a inang a, vawi riat ve ve an teammate te goal khung tur an siam sak. QPR forward Austin hian goal 17 a khung a, ani aia English forward goal khung tam chu Harry Kane (20 goals) chiah a ni.

Player pahnih bakah hian Burnley keeper Tom Heaton chu a vawi khatna atan England squad-ah koh a ni bawk.

England Squad

Goalkeepers: Rob Green (QPR), Joe Hart (Manchester City), Tom Heaton (Burnley).

Defenders: Ryan Bertrand (Southampton), Gary Cahill (Chelsea), Nathaniel Clyne (Southampton), Kieran Gibbs (Arsenal), Phil Jagielka (Everton), Phil Jones (Manchester United), Chris Smalling (Manchester United).

Midfielders: Ross Barkley (Everton), Fabian Delph (Aston Villa), Jordan Henderson (Liverpool), Adam Lallana (Liverpool), Ryan Mason (Tottenham), James Milner (Manchester City), Raheem Sterling (Liverpool), Andros Townsend (Tottenham), Theo Walcott (Arsenal), Jack Wilshere (Arsenal).

Forwards: Charlie Austin (QPR), Wayne Rooney (Manchester United), Jamie Vardy (Leicester), Danny Welbeck (Arsenal).