CYMA FOOTBALL Armed Veng, Armed Veng, Armed Veng

A zawna a vawi thum nan nimin tlai khan Armed Veng chuan CT Group Cup, CYMA Football Toutnament 2015 champion nomawi an chawi. Final match-ah hian striker William Lalnunfela goal khat thun hmangin Armed Vengin Lengpui chu 1-0 in an hneh.

CYMA Football hian Armed Veng hi an vawi nga champion-na chiah a ni a, anni aia champion ngun an awm lo. Kum 1985 aṭanga khelh ṭan CYMA Football-ah hian kumin hian Mizoram Football Association nen ṭangkawpin team 191 an inziak lut a, tournament ṭan a nih atanga team an tel tam ber ṭum a ni.

Inkhel chanchin

Player nei ṭha zawk Armed Vengin inkhel bul an ṭan fuh a, inkhel an thunun nghal. Corner aṭanga ball lo kal chu B Zoramthanga'n a tauh goal nghal teuh hle. Hemi hnu hian Vanlalduatsanga chuan penalty area pawn aṭanga ṭha taka a pet chu Lengpui goalkeeper Laldawngliana'n ropui takin a lo dang bawk.

Ball chang tam Armed Veng lamin Lengpui tlar hnung an su nghing a, minute 21-ah vengtu nei lo William Lalnunfela chuan goal hmahruai a khung. First half-ah an capatain Lalthangliana inhliam vangin an la chhuak bak Lengpuiin chanchin chhinchhiah tur an nei tam lo.

Second half-ah Lengpuiin hma an sawn hret a, goal khung tumin an bei let. Darkar khat an inkhelh tlin hnuah Aizawl FC midfielder Rohmingthanga corner pet chu Isak Lalremruatkima'n a tauh goal over. Isak-a hmang bawkin Lengpuiin chance an nei leh a, box chung hnai set sawt aṭangin goal veilam sirah a pet leh hlauh bawk.

Hun tawp nan minute 10 chauh a awm tawhah Armed Veng bawk an che hlauhawm leh. Vanlalduatsanga pet kawh tak mai chu Dawnga'n ṭha tak maiin a lo dang a, ball per lo kal let William-a pet a lo dang zui bawk. Lengpuin nawr let ve leh mah se Armed Veng defender Lalnghinglova, Zoramthanga leh Lalramchullova te an ding khawng tluan thei.

Kum 2006-a YMA football-a Lengpui champion ṭuma an star JS Hmar, Thangliana leh Rohmingthanga-te an la chuai lo a, an vanglai a pêl tawh chungin an team-te final hruai thlengtu an la ni.

Champion phu Armed Veng

Goal khung a pawimawh a, chumi rual chiah chuan goal chhuah loh a pawi­mawh. Armed Veng hi an tlarhnung a phui ṭha hle. Tun tournament-ah hian champion turin match sarih an khelh aṭangin goal li chiah an chhuah a, captain MP-a a ṭangkai ngei mai. An tlar hmalam pawhin goal 22 zet an khung.

An striker William chu match thum chiah khelh mah se goal li a thun a, round of 32 aṭanga chhiar ṭanin top scorer a ni a, man of the final-ah an thlang zui.

Eng nge an sawi?

Armed Veng coach Lalram­chhuana Ralte chuan, "Pathian malsawmna a ni a, veng mipuite ṭanrualna a ni e. A zawna vawi thum champion theia kan awm hi ka lawm a, player-te thawhrim rah a ni e," a ti a; Ramchuana hi kum 2003-a National Sub Junior Football Championship-a Lammuala Mizoram champion ṭuma player kha a ni.

Lengpui manager R. Than­ngura chuan, "Kan theihtawpin kan bei a, kan khel chhe loin ka hria. Amaherawhchu kan khingpui Armed Veng kha an ṭhat em avangin kan inveng seng lo a ni. Final min hruai thlengtu Pathiag chungah ka lawm hle. Tin, veng mipui leh VC ten min ṭawiawm ṭha em em a, tournamnet kan khelh ṭan tirh aṭanga a tawp thlenga min ṭawiawmna avangin lawmthu ka sawi a ni." tiin a sawi.