FIFA Presidential candidate aṭangin Figo a inhnukdawk

Portugal midfielder hlui Luis Figo chu May 29-a FIFA president chuh tur aṭangin a inhnukdawk a, Dutch FA president Van Praag chu presidential candidate aṭang hian a lo inhnukdawk tawh bawk a ni.

Sepp Blatter khing tur pathum Jordanian Prince Ali Bin Al-Hussein, Dutch FA president Michael van Praag leh Luis Figo te hi tunhnaiah inhmukhawmin an zinga Blatter khing zo ber tura an ngaih chu vawrhchhuah mai an rel nia sawi a ni a, tunah Figo leh Van Praag inhnukdawkin Prince Ali a mal din dawn ta a ni.

FIFA president thlanna neih leh turah hian Sepp Blatter chu a vawi nga na atana president ni leh turin a dinhmun a ṭha hle a, hemi chungchang hi sawi langin Figo chuan, "Tuna kan kal danah hi chuan mi pakhatin thuneihna pumhlum a nei dawn a, chu chu ka chhia leh ṭha hriatna hian rem a ti ngai lo ang," tiin Blatter tih tlak ngei a duh vanga inhnukdawk a nih thu a sawi.

Kum 42-a upa Figo chuan, "Hmun tam takah zin kualin mi hrang hrang ka kawm a, chuta ṭanga ka zirchhuah chu FIFA kalphung thlak duhtu tam tawhzia hi a ni. Khawvelin FIFA hi organisation ṭawp tak leh eirukna hmunpui hmuhin an hmu a, hei hi thlak danglam kan duh a ni," tiin FIFA chuan then fai a mamawh takzet thu a sawi.

Real Madrid player ropui ṭhin chuan, "Ka mit ngeia ka hmuh laiin federation president ṭhenkhat chuan kan FIFA hruaitute hi ramhuai nen an tehkhin hial a, mahse satge-ah mipui hmuha thu an sawiin FIFA hruaitute chu Isua ang hialin an chhuah leh lawi si a, thlak danglam ngai hi chu a awm chiang a ni," a ti.

Figo chuan Blatter-a chuan eng vanga election manifesto tlangzarh lo nge a nih zawtin, vantlang hmaa debate buatsaih a ni miah lo bawk chu a dem a, Blatter chu ruahmanna engmah a neih loh vanga hlauthawngah a puh a ni.

Figo ang tho a inhnukdawk Van Praag chuan Prince Ali a thlawp tur thu sawiin, "Tun dinhmunah chuan Prince Ali Bin Al-Hussein hi Sepp Blatter khing thla turin a awm ber a, chance a nei ṭha ber a ni. Min thlawptu zawng zawng te'n Prince Ali hi thlawp turin ka ngen che u a ni," tiin amah thlawptute chu Prince Ali thlawp turin a sawm zui.

English Football Association chuan Prince Ali an thlawp tur thu an tichiang tawh a, Scottish FA-in Van Praag hi an thlawp tur thu a inhnuhdawh hma in an lo sawi tawh bawk.

Van Praag hian Ningani khan Prince Ali nen Amsterdam khawpuiah chanchinthar lakhawmtute an kawm a, Dutch FA president chuan, "Tuna kan president neih lai mek hruaina hnuaia FIFA kal tir zel hi keini chuan thil theih lohah kan ngai a ni," tiin FIFA kal zel na tur atan Blatter paihthlak ngei chu a pawimawh thu a sawi.

FIFA president thlan tur hi a tirah chuan chuh tum an tam hle a, mi paruk laiin an hming an pe lut. Mahse, February thlaa FIFA deputy general secretary Jerome Champagne a inhnuhdawh hnuah Tottenham Hostpurs player hlui David Ginola chu a inhnukdawk ve leh a, tunah Figo leh Van Praag te Blatter paihthlak theih zawk beisei vangin an inhnukdawk ve leh ta.

FIFA president thlanna hi Zurich khawpuiah neih tur a ni dawn a, FIFA hnuaia ram 209 te'n vote neiin president tur chuan hmun thuma ṭhena hmun hnih first round voting-ah vote a hmuh phak a ngai a, vote hmuh in an vanga inthlan nawn a ngai a nih erawh chuan vote hmu tam zawk zawk in hnehna an chang dawn a ni.