June 2 aṭangin MBBA Season Opening Tournament

Mizoram Basketball Association chuan June 2 aṭangin Hawla Indoor Stadium, Republic Vengthlang-ah Season Opening Tournament an buatsaih dawn. Inelna tur atana inpuahchah nan MBBA chuan 'Referee Recruitment cum Clinic' May 26-29 khian an nei dawn.

Referee ṭha zawk

MBBA hnuaiah State Referee tur lak tharna neih a ni dawn a, heta tel tur te chu May 26 chawhma dar 11:00-a registration ti fel hman turin Hawla Indoor Stadium thlen tur a ni.

Referee recruitment-ah hian MSL club aṭanga a hnuai lam club zawng zawngten referee tur mi rintlak (Player ni kher lo pawh) pakhat aia tlem lo kal tir tur a ni a, club aiawh kal tir lo chu hrem an ni ang.

MBBA hnuaia referee ni sa te pawhin clinic an chhim ngei ngei a ngai dawn a, referee ni tawhte hi chuan club ai an awh thei lo. Rules thar ber (FIBA 2014) hman tawh tur a nih dawn avangin club tin tan ngaih pawimawh a ṭul takzet a ni.

Player registration

May 26-29 chhung vek hian MSL Playoff khel Club leh MSL Club-te tan 'freeman' ziah luhna hun hawn a ni dawn bawk. Player pakhatah registration fee Rs. 20/-(sawmhnih) zel pein ziah luh theih a ni. Freeman ni lo ziak lut lui an awm a nih chuan hrem theih an ni ang.

Club Affiliation Form hi season danga hman thin nen a danglam lo a, Passport size thlalak copy hnih (2) ken tel tir a ni.

Entry Fee

2015-2016 Season Opening Tournament khel tur club te'n entry fee Rs. 500/- (per team) chu Hriati Enterprise, Khatla leh Y2Goal, Chanmari-ah pek tur a ni a. May 25-29 (Dar 10:00 AM -5:00 PM) chhunga entry fee pe hman lo chuan season opening an khel ve thei lo ang.