Mizoramin Sub Junior Girls Football-ah final an lut

National Sub Junior Championship for Girls semi­final-ah nimin khan Mizoramin Offee Lalhming­chhuanpuii leh B. Lalhriattiri goal hmangin Jharkhand 2-1 in an hneh a, final an lut. Pathianni khian Bihar 3-0 a hnehtu Haryana nen final an khel ang.

Mizoram hmeichhe team hian Sub Junior Cham­pionship-ah semi final an thleng ngai lo a, an vawi khat thlennaah hnehna an chang a, champion thei dinhmunah an ding.

Inkhelh hun hi tlai dar 3:00 ni mah se inelna neihna hmun Odhisa-ah boruak a lum em avangin Mizoram lamin an theihna an lanchhuah tir thei lo. Semifinal thleng tura goal 40 khung thei Mizoramin bul an ṭan ṭha a, minute 8-na lekah Elizabeth Vanlalmawii corner pet chu Offee-i'n a tauh lut nghal. Minute 38-naah winger Grace Lalrampari'n Jharkhand defender te a vawrh khum a, keeper-in ball a man hmain captain Hriati'n a tauh goal.

First half tawp hma hretin Jharkhand-in goal khatin an chhang let a, second half-ah goal a lut tawh lo. Inkhel chawhhnu lamah hian captain Hriati chu Jharkhand defender ten an nghawk avangin zawn chhuah a ni a, damdawi-in pan pui nghal ni mah se final-ah erawh a rawn kir hman beisei a ni.

Mizoram manager Lal­nun­sanga (Anuna) chuan, "Refe­ree thutlukna hriatthiam a har ṭhin khawp mai. Elizabeth-i'n keeper chiah a hmachhawn hnuah tihtluk a ni a, foul an ham lo. Ṭum danga kan khel kan pha lo a, kan khelh ṭhat loh ṭuma hnehna kan chang thei hi kan lawm hle a ni," tiin a sawi.

MFA Grassroots-a coach ni mek Anuna chuan, "Jharkhand hian khaw lum an tuar thei chu thuhran ni se, game an fight hrim hrim a, khelh an harsa khawp mai. Final-a kan hmachhawn tur Haryana pawh hi Jharkhand ang tho an ni a, khelh an har khawp ang," tiin a sawi.

Mizoram hian group match hnuhnung berah Bihar 3-1 in an hneh a, Haryana hian Bihar hi 3-0 in an hneh thung. Group match boruak aiin semifinal boruak a sang zawk a, Haryana hi result aṭanga thlir mai chuan an chungnung zawk.

Mizoram coach Bethsy Lalhlimpuii chuan, "Player mal khaiah chuan Haryana chu an ṭha zawk ngei ang. Amaherawhchu team angin kan ṭha zawk a, kan player-te hian team work an neih ṭha a, kan champin theih ngei ka ring," tiin Haryana an hlauh loh thu a sawi.

Bethsy chuan sawi chhunzawmin, "Maharashtra, Kerala, Bihar, Telangana leh Tripura ten an state-ah hmeichhe league an nei vek a, sub junior-ah tluk mah ila senior-ah chuan mumal taka inelna nei state tluk hi chu a la harsa ang. Kan player-te pawh hian heng state club aṭang hian sawmna an hmu nghal a, a lawmawm khawp mai. Chutihrualin kan ramah ngei MPL ang hian hmeichhe league hi awm se ka ti hle," tiin state dang kan tluk lohna lai a tarlang.

Mizoramin final a thlen vawi khatna turah team enkawltute chuan Mizo mipui ṭawngṭaipuina an ngen.