Malaysia lakah India an chak zo lo

November international break-a an match neih chhunah India chuan Malaysia an hmachhawn a, Hyderabad khawpuia inkhelah chak zawk awm loin an inhnehtawk. Team pahnih hi 1-1 in an ṭin a, coach Manolo Marquez hnuaiah India-in chak an la nei lo tluang zel.

Malaysia hian minute 19-na lekah India goalkeeper Gurpreet Singh Sandhu tihsual zar zoin goal hmahruai an khung a, goal khungtu chu Paulo Josué a ni.

Mahse, mahni mualah India-in hnufual reng an duh lo a, Rahul Bheke chuan minute 39-naah si phurh sutna goal a khung. Hun tawp thlengin goal dang a lut tawh lo a, 1-1 in an ṭin.

Beiseina

India coach Manolo Marquez-a'n rin loh lutukin Irfan Yadwad chu ram tana a match hmasa berah bul a ṭantir a, Chennaiyin striker hi Lallianzuala Chhangte leh Farukh Choudhary ten thlawpin, tlarhmaah player pathum an awm.

Blue Tigers tan Lianzuala bakah Lalengmawia Ralte (Apuia) chuan inkhel bul a ṭan bawk a, Mohun Bagan midfielder hi Bengaluru player Suresh Singh leh Mumbai City midfielder Brandon Fernandes te nen midfield-ah an inkawp.

Gurpreet-a'n si ban nghakin, Rahul Bheke, Anwar Ali, Sandesh Jhingan leh Roshan Singh te tlarhnungah an inkawp a, Blue Tigers tan tawnhriat nei ṭha Sandesh chuan captain armband a hreng bawk.

Chetsualna

India coach Marquez-a'n 4-3-3 formation hmangin, Malaysia lakah chak ngei a tum tih a chiang a, Blue Tigers a kaihhruai vawi linaah chak hmel hmuh ve tawh a beisei - a beisei ang ngawt erawhin thil a kal lo hle.

Minute 19-naah field chanve vel aṭanga ball thlawh luh chu keeper pasang Gurpreet-a'n tauh chhuah tumin a tlan chhuak a, mahse, he ball hian Bengaluru keeper hi sawt khumin Paulo Josue ke bulah a tla.

Kum 35 mi striker hian chak taka um zuiin, goal ruakah a khung a, Gurpreet tan tih theih a awm lo - Josue hi Brazil mi niin, Malaysia-a kum sarih a khelh hnuah khua leh tui nihna neiin, Malaysia tan a inlan zui. India laka a goal khung hi ram tan match 16 a khelha goal ruk a khungna chiah a ni.

A chhanletna

India an awm mai mai bik lo - mahni khelmualah rei tak si phurh an duh lo a, minute 39-naah Rahul Bheke hmangin si phurh an sut. Bengaluru defender hian Brandon Fernandes-a corner pet aṭanga ball kal chu a tauh lut a, 1-1 a ni.

Blue Tigers-in chak ngei tumin nawr zui mah se goal dang an khung thei lo a, Sunil Chhetri chawlh hnuah India-in striker hriam tak an la nei rih lo - mikhual Malaysia nen 1-1 in an ṭin.

Kum 2024-ah India national team hi an la chak miah lo a, kuminah international break a awm dawn loh avangin chak nei loin kum 2024 an khar dawn tihna a ni!

Engtin maw?

India tan result ṭha a ni lo - mi tluklehdingawn khat chuang meuh chenna, Indian Super League-a sum tam tak sengtu ram hian 2024 chhungin national team hneh an nei lo a, Indian football tan kum chhia, tih hial tlak a ni.

Blue Tigers hian 2023 AFC Asian Cup hmangin kum bul an ṭan a, mahse, Australia (2-0), Uzbekistan (3-0) leh Syria (1-0) te laka tlawm vekin, chiang takin an tla a, an insiamṭha zui lo - March international break-ah World Cup qualifier match hnih Afghanistan nen khelin, vawi khat an in draw a, vawi khat an tlawm.

Blue Tigers hian June international break-ah World Cup qualifier khel lehin, Kuwait (0-0) an inhnehtawkpui hnuah, Qatar (2-1) an ngam lo a, result ṭha zawk beiseina avangin coach Igor Stimac chu sum tam tak sen huamin an ban zui.

A danglam lo

All India Football Federation-in a kalphung a her danglam a, India coach ni tura dil hming langsar tak tak awm mah se, hming langsar lam ringawt thlir loin, coach ṭha ni tura an ngaih an la lut.

FC Goa enkawltu Manolo Marquez chu ISL club enkawl reng chunga India enkawl turin an la lut a, mahse, tun season bak Goan club hi a enkawl thei tawh lo ang - tun thleng chuan Spanish coach hian a la chakpui thei lo.

September international break-ah khan Mauritius (0-0) inhnehtawkpuiin, Syria (3-0) an ngam lo a, October-ah Vietnam (1-1) inhnehtawkpuiin, Malaysia (1-1) nen an inhnehtawk leh ta - India beisei result a la thleng lo.