India tan Valpuia a inlan

Malaysia lakah India tan Lallianzuala Chhangte leh Lalengmawia Ralte ten inkhel bul an ṭan a, an khel ṭha dun hle - Lza mual sirah a hlauhawm ṭhin a, midfield-ah Apuia a ding nghet tlat bawk.

Edmund Lalrindika pawh minute 79-naah luhtir niin, Inter Kashi forward hi ram tan match nga a inlan ta der - Mizoram football tana lawmna belhchhahtu erawh minute 67-naa Hmingthanmawia Ralte lut chu a ni a, Mumbai City defender hian ram tana a match hmasa ber a khel.

Valpuia chuan, "Ram tan ka inlan ve ta reng mai a, Pathian kaihhruaina vang liau liau a ni. A mimal leh team ang pawhin hmasawnna tur tam tak kan la nei - ka luh dawn khan, inkhel danga ka tih ṭhin ang thoin, rilru ṭawngṭaina nen, ka theihna zawng zawng ka phochhuah theih nan Pathian ka dil a ni," tiin Vanglaini a hrilh.

Tun season-a Mumbai player pawimawh Valpuia chuan sawi zawmin, "Ram tana inlan hi ka tum ve reng ṭhin a ni a, 'Engtikah emaw chuan ka la inlan ve ang' ka ti reng ṭhin. Ka beisei aia hmain hun ṭha ka nei ta zawk a, mumangte pawh a ang zawk hial a ni," a ti.

Valpuia hi Mizo player zinga India tana inlan thei 17-na chiah a ni a, Mizo zinga ram tana inlan hnem ber chu Jeje Lalpekhlua niin, 'The Mizo Sniper' hminglem an pek striker hian ram tan match 56-ah goal 23 a khung hman a ni.