A tawp nan Mizoram an chak

Santosh Trophy-a beisei tur nei tawh lo Mizoram team chuan nimin khan an match hnuhnung ber khelin, Sikkim chu 7-0 ngawtin an sawp - B. Malsawmzuala enkawl Mizoram tan erawh mualpho tur khuhna chauh a chang a, match hmasa pahnihah Tripura (4-1) leh Manipur (2-1) an ngam loh avangin Santosh Trophy an mangṭha.

Mizoram tan match hmasa pahniha goal khung ve vetu F. Lallawmkima chuan goal hnih khungin, Michael Lalbiaksanga, Laltluangliana, HK Lalhruaitluanga, Lalthankima (penalty) leh Lalthanpuia ten goal khat ṭheuh an khung a, Sikkim-in a chhanletna tur an nei lo.

Agartala, Tripura-a neih inelnaah Mizoram hi Agartala Mizo Welfare Association-ten a hmunah ṭawiawmin, kawng tinrengah an pui a, YouTube lamah an inkhel live-in an pekchhuah sak bawk - Mizoram team-te chuan AMWA chungah lawmthu an sawi.