GIG Motors Inter Village Football : Dinthar zinkawng a tawp hma

GIG Motors All Mizoram Inter Village Football Championship-ah Dinthar zinkawng a tawp - nimin khan round of 64-ah first round-a 'bye' Salem Veng an hmachhawn a, 5-3 in RG Stadium-ah an tlawm.

Dinthar hian first round-ah Tuirial chu 3-2 a hnehin, round of 64 an lut a, Salem Veng an hmachhawn. Dintharin an goal hmasa ber an khungin Salem lam hian goal li an khung tawh a, tualchhung football-a hming langsar Dinthar tan thawhleh a harsa tawh.

Salem Veng tan hian Lalchhuanawma leh K. Vanlalhmunmawia ten minute 55 chhungin goal hnih ve ve an khung hman a, Dintharin Vanlalruata (own goal) leh C. Royal Mosed hmanga chhangletin, 4-2 a ni hman a, beiseina an nei.

Mahse, Salem tan Lalnunzira'n minute 85-naah a khung leh a, hun pek belha Samuel Laltlanthanga goal khungin Dinthar a chhan phak tawh lo - nimin round of 64 inkhel pakhat dangah Lengpui chuan 1-0 in Chite Veng an hneh a, Lalrokima'n penalty hmangin inkhela goal awmchhun a khung.

Nimin lama football veng langsar inlan zingah Bawngkawn chuan 4-1 in Mission Vengthlang an hneh a, Farkawnin 5-0 in Tuidam an sawp. Jt. VC Vairengte chuan 7-0 ngawta Nursery Veng hnehin, HK Lalbiakkima chuan goal li ngawt a khung a ni.