MotoGP: Kum 2024 season atan a herliam ta

Bike intlansiakna sang leh ngaihhlut ber, khawvela bike khalh thiam leh a ṭha ber berte inelna MotoGP 2024 season chu a lo herliam leh ta a, thawnthu ngaihnawm leh hriatreng tawh tur tam tak a hnutchhiah thung.

Jorge Martin a champion a, season tluana chhut chuan a chak tam ber a ni lo - mahse nghelnghet leh ṭha taka kum tluana tlan thei a nih avangin nomawi chawitu nih a phu, a tan chuan mellung pawimawh a ni nghal bawk.

Portuguese GP

Season ṭan hma kha chuan, champion lai Francesco Bagnaia chu mi rinkai leh buk rit ber a ni. Engtiangin nge Martin a rawn inrawlh a, a champion zui theih dan hi mi tam tak hriat châk a ni ngei ang, sawi vek sen erawh a ni dawn lo.

Qatar ramah intlansiak hmasa ber an tlan a, hnehna changtu chu Bagnaia a ni. Intlansiak pahnihnaah Martin hming a lo lang, sprint race lamah pathumna a ni a, rider ṭha dangte el turin theihna a nei tih chu a takin a rawn lantir.

Martin a chet fuh bakah Bagnaia chu Marc Marquez nen an chesual zui. Portuguese Grand Prix-ah Martin a chak ber a, intlansiak vawi hnih an zawh chuan Martin hian amah hnaih bertu Brad Binder aiin point 18-in a hmu tam der, Bagnaia nen an inkarah point 23 a awm thung.

May thla chuan

Team tinin theihtawp ann chhuah a, an ṭhatna leh ṭhat tawk lohna lai an inhre ṭan - hetiang boruak karah hian Martin hi chiai lo leh tlak hniam lai nei loin a kal thei tlat. France ramah hnehna a chang a, a chet fuh laiin Baganaia chu a chesual.

Le Man tlankawngah Martin bawk kan hmu, sprint race bakah intlansiak pangngaiah hnehna a chang a, point hmuh theih sang ber chu a hui vek tihna a ni - he tlankawnga an tlan zawh hian point 38 tehmeuhin hma a hruai fal ta a ni.

French GP aṭanga German GP an tlan kha Martin chetfuh loh lai deuh tiin a sawi theih ang, a zawnin vawi li ngawt mai Bagnaia chuan hnehna a chang, nipui chawlh an hman meuh chuan Italian rider hian point 10 a sang fal chungin chawlh a hmang.

Chawhnu lam

Silverstone tlankawngah British GP an tlan a, hemi ṭum hian Bagnaia chu sprint race-ah chesualin intlansiak takah pathumna a ni - Martin erawh hengahte hian pahnihna ve ve a ni a, a elpuiin point a hmuh loh tawp laiin a lo khawl leh keuh ṭhin.

Fur an hmachhawn a, chumi hnuah favang hun hmang lehin intlansiak kawng leh a kalhmang pawh a inang lo viau. Hetiang boruak intlak mai bakah, kawng huh leh roa intlanchhawk vel karah hian Martin chu tlakhniam em em lai nei loin a tlan mar pat thei.

Bagnaia hi a thiamin a chak nameuh mai, intlansiak ho chak tam ber pawh a ni. Mahse, chet fuh loh ni a nei zauh ṭhin a, point hmu miah loa awm hian nghawng a nei na ṭhin, a tawpah a tawrh phah ta a ni, point belhkhawm zel a nih avangin Martin a chungnung ta daih.