Inkhelh chawlhsan turin Italy ka pan lo - Nadal

Rafael Nadal chuan Spain tan Davis Cup a khel dawn a, inelna neihna tur hmun Italy-ah training a nei ngawrh hle - Nadal chuan mimal tennis chawlhsan tur ni loin, an ram tana feh chhuak a nih thu a sawi.

Davis Cup zawh hnuah Nadal hi a chawl dawn, tennis a chawlhsan tur thu hi Davis Cup aia sawi hlawh zawk a ni mek. Mahse, Nadal erawhin a hun tawpna leh inthlahna boruak chu tournament aia pawimawh lo zawk a nih thu a sawi chhuak.

Grand Slam vawi 22 champion Nadal chuan, "Inkhelh chawlhsan tura zinchhuak ka ni lo a, team tana theihtawp chhuah tura zin chhuak ka ni zawk, mimal tih ṭhat aiin tunah chuan team a pawimawh zawk.

"Singles leh doubles match hmasa inelna a ni a, chuvangin inkhel pawimawh bik a awm thei lo, a pawimawh em em vek. Tournament zawh hunah ka chawl dawn ngei mai, chu erawh chu inelna hnu lam thil tur a ni," a ti.

Kar hmasa Ningani khan Nadal hian Malaga, Italy a thleng daih tawh - an team zinga a hman remchang apiang chu training a neih pui ṭhin, a taksa dinhmunin a zir tawk lo a nih chuan singles match bik chu khelh loh mai a tum.

Davis Cup-ah hian ram pariat chauh an dam tawh - Spain hian Netherlands an hmachhawn dawn, a chak zawk hian Germany leh Canada inkhela chak zawk nen semifinal an khel zui leh ang.

Inelna thlengtu Italy leh Argentina an intum dawn a, inkhel dangah United States leh Australia inhmachhawnin a chak zawk an intum ang ang. November 24, Pathianniah a hmawr an bawk dawn a ni.

Squad:-

Spain: Rafael Nadal, Carlos Alcaraz, Roberto Bautista Agut, Pedro Martinez, Marcel Granollers, David Ferrer (non-playing captain)

Argentina: Sebastian Baez, Francisco Cerundolo, Tomas Etcheverry, Maximo Gonzalez, Andres Molteni, Guillermo Coria (non-playing captain)

Australia: Alexei Popyrin, Jordan Thompson, Thanasi Kokkinakis, Max Purcell, Matthew Ebden, Lleyton Hewitt (non-playing captain)

Canada: Milos Raonic, Denis Shapovalov, Gabriel Diallo, Alexis Galarneau, Vasek Pospisil, Frank Dancevic (non-playing captain)

USA: Taylor Fritz, Tommy Paul, Ben Shelton, Rajeev Ram, Austin Krajicek, Bob Bryan (non-playing captain)

Italy: Jannik Sinner, Lorenzo Musetti, Flavio Cobolli, Andrea Vavassori, Simone Bolelli, Filippo Volandri (non-playing coach)

Netherlands: Tallon Griekspoor, Botic van de Zandschulp, Jesper de Jong, Wesley Koohlof, Paul Haarhuis (non-playing captain)

Germany: Jan-Lennard Struff, Daniel Altmaier, Yannick Hanfmann, Kevin Krawietz, Tim Puetz, Michael Kohlmann (non-playing captain)