Match sarih atan Bentancur an hrem

Tottenham midfielder Rodrigo Bentancur chu chi inthliarna lam hawia a ṭawng chhuah avangin match sarih chhung atan hrem a ni a, hei bakah hian £100,000 chawi tura tih a ni bawk.

June thla khan Bentancur hi an ram Uruguay-a TV pakhatah a inlan a, hemi ṭum hian Spurs tana a khelhpui Son Heung-min chungchang a sawi a, Korean ho chu an hmel a inang deuh vek nia a hriat thu sawiin, hei hi chi inthliarna lama ngaihsak a ni.

South Korea international Son Heung-min leh Bentancur te inkar a chhe zui lo a, boruak ṭha takin an awm. Tun season Premier League-ah pawh match 10 a khel tawh a, vawi khat chiah inlan loh a nei tihna a ni.

Bentancur leh Son inhaw lo mah se, a thiltih hi dan bawhchhiatna a nih avangin England rama football thuneitu sang ber Football Association (FA) chuan a hrem zui ta tho.

Kum 27 mi Bentancur hian EPL match-ah Manchester City, Liverpool leh Chelsea te a hmachhawn thei dawn lo, heng bakah hian Manchester United nen League Cup semifinal an khelh hunah pawh a tel thei lo ang.

Bentancur-a'n Son chungchang a sawina kha anmahni ram leilung ni mah se, a inkhelhna hmun chu FA thuhnuaia awm a ni a, amah ang bawk hian Chelsea midfielder Enzo Fernandez chungchangah pawh thil a lo thleng tawh a ni.