Rockets lehthaltu Bucks

Hun tawp nan second 3.9 chauh a awm tawh a, dinhmun hniam zawka ding Milwaukee Bucks chuan basket pawimawh bik rawn neiin Milwaukee Bucks chu Houston Rockets lakah 101-100 in a chakpui.

Rockets hi chak turin an dinhmun a ṭha hman hle, minute khat leh second 59 a la awm lai khan 100-94 in hma an hruai. Mahse, hun tawp dawnah Lillard a inlar, free throw vawi hnih a luh bakah AJ Green-a'n 3-points a neih tur a siamsak.

Lillard hian a la duhtawk mai lo, second hnuhnung ber pawh a pawimawh vek tih fiah turin a lay-up lut leh zauh a, chak lo tur anga lang tawh Bucks chu hnehna a chanpui daih, hnehna hlu bik a ni ngei ang.

Fiserv Forum, Milwaukee-a inkhelah Damian Lillard hian point 18 a neih bakah a ṭhiante tan vawi 10 a siamsak bawk a, ani bakah hian point 27 neitu Brook Lopez leh Giannis Antetokounmpo (20) te chu an thawhhlawk hle bawk a ni.

Lillard chuan, "Ka tan chuan thil thar a ni, hetiang taka hun pawimawh laia chet fuh hi chu a harsa. Engkim mai kha ruahmansa ang maiin a kal fuh, a tawpah phei kha chuan eng thil ber nge thleng pawh ka ka hrethiam tawh lo," a ti.

Rockets hi tun hnaiah vawi nga an chak zawn a, an kaltluang lai tak chu a tawp ta rih - Eastern Conference lamah palina dinhmun an la luah a, hnehna changtu Bucks erawh Western Conference table mawng lamah an la awm thung.

Los Angeles Clippers pawh dinhmun hniam zawka an awm hnuah an tho chhuak. Intuit Dome-a inkhelah Clippers hian Golden States Warriors chu 102-99 in an hneh, an chak theih nan Norman Powell (23 points) a langsar hle.

Clippers coach Tyronn Lue chuan, "Ka naute hian hlauh an nei lo, inrintawk taka inkhel an hmachhawn hi chuan result ṭha kan nei ṭhin a, tun ṭumah pawh khan beidawng duh loa an khelh hram hramna chu a rah kan seng," a ti.