Jamaica hnehtu USA

Nimin zing khan United States chuan an mikhual Jamaica chu 4-2 in an hneh a, an chak avang hian CONCACAF Nations League khelh laiah semifinal an lut.

US hian an match hmasa zawkah Jamaica hi 1-0 in an lo hneh tawh bawk, inkhel pahnih belhkhawmah 5-2 in an chungnung zawk a, coach thar Mauricio Pochettino kaihhruaina hnuaiah an kaltluang rih hle.

City Park-a inkhelah US tan Christian Pulisic chuan goal a khung hmasa ber - jamaica Di'Shon Bernard chuan anmahni lamah tilut zuiin, Ricardo Pepi leh Timothy Weah ten an khung a, mukhual tana Demarai Gray-a goal hnih khungin awmzia a nei phak lo.

US coach Pochettino chuan, "Kan khelh danah ka lawm hle, a bik takin a tir lam minute 45 chhung kha chuan duhthusama ṭhain kan khel a, goal khung theihna remchang kan hmuh angte kha kan hmang ṭangkai thei em em bawk.

"Kan squad-ah hian player ṭha leh theihna nei sang tak tak an awm a, tunah hian kan ruahman anga khel turin kan insiamrem mek, chutiang boruak vel kara hnehna chan chu a lawmawm hle," tiin a sawi.