San Marino an chak!

FIFA Ranking-a a mawngphah luahtu San Marino chuan an ram chanchina result duhawm an siam - UEFA Nations League-ah Liechtenstein chu khualmualah 3-1 in an hneh a, an ram chanchina khualmuala an chak hmasak ber a ni a, competitive match-a goal khat aia tam an khung hmasak ber a ni a, friendly match pawh chhiar tel vekin goal thum an khung tlin hmasak ber a ni bawk!

FIFA ranking-a 210-na ram hian Liechtenstein hi an ngam ve riau - tun hmain vawi hnih an lo hneh tawh a, mahse, an chak hi San Marino-ah ve ve niin, 1-0 ve vein an chak a, tunah chuan khualmualah 3-1 in an hneh ta.

San Marino hian match 211 an hmachhawn tawhah vawi 199 tlawm an nei a, match sarihah goal 10 aia tam an chhuah - Italian division hniam lama club enkawl ṭhin Roberto Cevoli chuan nikum khan San Marino hi enkawl ṭanin, match 10 a kaihhruaiah vawi hnih hnehna a chanpui ve ta a ni.

Thawhṭanni zan inkhelah hian FIFA ranking-a 200-na Liechtenstein hian goal an khung hmasa zawk a, Aron Sele chuan a khung. Mahse, San Marino tan Lorenzo Lazzari, Nicola Nanni (penalty) leh Alessandro Golinucci ten an chhanglet a, 3-1 in an chak - season tharah chuan a hniam ber League D aṭangin League C-ah an insawn chho ve tawh ang.

Penalty chhuih luttu Nicola Nanni hian ram tana a goal thum khungna a ni a, ram tana goal khung tam pahnihna a ni! San Marino tana khung tam ber chu Andy Selva niin, Italian third division lama khel ṭhin striker hian ram tan match 73-ah goal riat a khung.