Croatia-in Portugal an chelh

UEFA Nations League-ah Croatia-in Portugal chu 1-1 in an chelh a, an mamawh point khat an hlawhchhuah avangin quarterfinal an khel dawn - Portugal erawh Croatia an hmachhawn hma hian an tling chiang tawh sa a, group hmahruaitu ni chungin quarterfinal an lut.

Portugal hian an dinhmun a chian tawh sa avangin player langsar engemaw zat an hahdamtir a, Cristiano Ronaldo phei chu squad-ah pawh a tel lo - heti chung hian an mikhualna ramah Joao Felix hmangin goal an khung hmasa zawk a, Chelsea forward hian minute 33-naah a khung.

Goal an chuah hnuah Croatia an ṭang sawt a, mahse, Andrej Kramaric chuan a chance neihah woodwork uiawm takin a tihper. Minute 65-naah Croatia-in goal an khung ta nge nge a, Josko Gvardiol chuan Kristijan Jakic-a siamsak chu si phurh sut nan a hmang.

Kramaric-a'n Croatia chakpui theihna remchang a nei a, mahse, a hun ṭha neih chu Portugal goalkeeper Jose Sa-a'n a dansak a, 1-1 in inkhel a tawp - Croatia tan quarterfinal luh nan a tling tawk tho a, result chhia tia sawi tur a ni lo.

Group 1 inkhel dangah Scotland chuan 2-1 in Poland an hneh a, Poland hi League B-ah an relegate - Poland tan him turin draw a tawk a, Scotland tan chak a ngai thung a, hun pek belha Andrew Robertson goal hmangin Scotland an chak!

Scotland tana minute thumna leka John McGinn-a goal khung chu mualneitu Poland hian Kamil Piatkowski hmangin an chhanglet a, mahse, hun pek belhah Scottish team tan Robertson chuan chakna goal a khung.