A tawpah Newcastle an nui, Hull an tap

26th May, 2015

Hull City-in KC Stadium-ah Manchester United lamah goal an khung thei lo a, chak ta reng pawh ni se Newcastle United-in St James' Park-ah Moussa Sissoko leh Jonas Gutierrez te goal hmanga West Ham 2-0 an hneh avangin season thara Championship an khelh a ṭul tho tho. Queens Parks leh Burnley hnung zuiin Pathianni zana United nena inhnehtawk Hull City an relegate.

Premier League tawp zanah match 10 awmin an khel rual vek a, tla thei dinhmuna ding Hull leh Newcastle ten ngaihven an hlawh ber. First half-ah Paul McShane leh Dame N'Doye ten United lamah goal an khung a, offside vangin pawm a ni lo. St James Park-ah goal a lut bik lo, minute 45 zawha tla tur chu Hull an ni.

Second half an ṭan a, Hull an vanduai a, United keeper inhliam David de Gea aia lut Victor Valdes a che ṭha bawk nen Hull-in goal an khung thei lo. Hetihlai hian St James Park boruak erawh a nung ṭha hle, minute 54-naah Jonas Gutierrez cross chu Sissoko-a'n a tauh lut a. Cancer ngamtu Gutierrez hian minute 85-naah chakna a ngemnghet.

Newcastle tana goal khungtu pahnih hian kawr an phelh ve ve a, mipuiin thawm ṭha tak nen an chhawn bawk a, hei hian boruak awm dan chu a sawifiah awm e.

Final whistle a rik hnuah erawh Newcastle ṭantu ten club neitu Mike Ashley chu chhuak tura an duhthu lantirin "Get Out Of Our Club" (kan club chhuahsan rawh) tiin an au rual.

Newcastle neitu Mike Ashley chuan an him chian hnuah nomawi an chawi emaw Champions League khel tura an tling a nih loh chuan club a chhuahsan loh tur thu a sawi thung.

Hull erawh United laka inkhel thunun chungin an chak zo lo a, United substitute Marouane Fellaini-a'n red card a hmuh hnuah pawh goal an khung thei lo. Newcastle-in goal hnih an khung hnuah phei chuan an tla dawn tih a chiang a, Hull supporter-te'n lungngaihna nen Premier League tawp ni an hmang.

Newcastle manager lailawk John Carver chuan, "Match hmasa ber ka enkawl aṭang khan Newcastle manager nih hi ka duh takzet a, tun thlengin ka la duh zel bawk," tiin manager nih zel a inbeisei thu a sawi ve bawk.