French Open Roger Federer a chak nghal

Pathianni tlai aṭanga khelh ṭan French Open 2015-ah World Number 2 Roger Federer chuan a khingpui Colombian Alejandro Falla hneh­in second round a inhlangkai.

Grand Slam vawi 17 champion tawh Federer hian a game hmasa berah hian harsatna a tawk lem lo a, harsa lo takin 6-3, 6-3, 6-4 in a chak nghal a ni. Federer hian inkhel a thunun hneh hle a, Falla service hi vawi 16 zet chhuhsak theihna hun ṭha a hmu a, mahse vawi li chauh a chhuhsak thei thung.

Mipa inkhel dangah Stan Wawrinka chuan Marsel Ilhan chu 6-3, 6-2, 6-3 in a hneh a, Kei Nishikori chuan 6-3, 7-5, 6-1 a Paul-Henri Mathieu hnehin second round an inhlangkai ve bawk.

Hmeichhe lamah seeded pathumna Simona Halep chuan a khingpui seeded ni pha lo Russian Evgeniya Rodina chu 7-5, 6-4 in a hneh ve bawk a ni.

Federer a lawm lo

Pathianni tlai a Fede­rer-a'n hnehna a chan zawh hian fan pakhat chu court-ah tlan lutin Federer hi thla a zuk lak pui a, he thil hi Federer chuan a duh lo hle. Kum 2009 French Open final-ah pawh khan fan pakhat chu court chhungah a lo tlan lut tawh a, buaina a siam hmain vengtu ten an man hman hlauh.

Kum 33 a Upa Federer chuan, "Thil thleng kha a duhawm lo khawp mai. Naupang ang maiin an che leh ṭhin a, hei hi parctice naah pawh a thleng tho a ni. Centre court-ah kan inkhel a nih chuan tuman min rawn chim buai thei lo turah ka ngai a, hetianga min chimbuai thei hi a ṭha lo hle. Kum 2009 final-ah pawh khan court-ah fan a rawn tlan lut tawh kha a ni a, ka thil thleng avang khan an fimkhur tawh turah ka ngai a sin le," tiin a lungawi loh thu a sawi.