West Ham chhuahsan tur 'Big Sam'

West Ham-in tun season-a an match hnu­hnung bera Newcastle United an hneh loh hnu lawkin an manager Sam Allardyce chhuah tur thu an tichiang.

'Big Sam' tia an koh ṭhin Allardyce hian tun season tawp thleng West Ham-ah contract a nei a, The Hammers hian contract thar an zawrh tawh lo.

Kum 60-a upa Eng­lish manager hian kum 2011 khan West Ham a enkawl ṭan a, Championship division lama an awm lai a ni. A kum khat enkawlnaah 'Big Sam' a che ṭha nghal a, Premier League-ah West Ham a kaisanpui nghal a, an kaisan hnua an season hmasa berah hian Premier League-ah 10 na an ni pha nghe nghe.

Newcastle United leh Blackburn Rovers te pawh lo enkawl tawhtu Big Sam chuan, "Dik taka sawi chuan contract thar min zawrh pawh nise West Ham-a cham chhunzawm tumna hi ka nei lo. Tun hi he club chhuahsanna hun ṭha tak a ni a, club leh keima tan pawh ka chhuah hun hi a hun dik tak a ni," tiin West Ham a cham chhunzawm zel tumna a neih loh hrim hrim thu a sawi.

Big Sam-a'n West Ham a chhuahsan tur thu tihchian a nih hnu hian West Ham joint chairmen David Sullivan leh David Gold te chuan thuchhuah an siam nghal a, "He club tana a hnathawh zawng zawng vangin Sam Allardyce hnenah lawmthu kan sawi a, kum li kal ta a kan club a zawm lai leh kan tun dinhmun thlirin nasa takin hma min sawnpui a ni tih hi phat rual a ni lo. A chungah kan lawm takzet a ni," an ti.

Big Sam thlak tur hian West Ham chuan Napoli manager Rafael Benitez an beisei nia sawi a ni a, mahse Liverpool manager hlui hi Real Madrid-in an beisei ve tho avangin West Ham hian an chan a rinawm loh.