Silvio Berlusconi-a'n Ancelotti a duh
AC Milan president Silvio Berlusconi chuan an coach hlui tunhnaia Real Madrid-in an ban tur anga an sawi Carlo Ancelotti tan kawngkhar an hawn reng thu a sawi.
Italy prime minister hlui Berlusconi hian Thai sumdawng hausa Bee Taechaubol hnenah Milan hi hralh a tum nia sawi a ni a, midang hnena club a hlanchhawn hma ngei hian Ancelotti lak kir bakah club tana sum sen turte ruahman a duh niin an sawi.
Berlusconi hian Ancelotti hi kum nga chhung Milan a cham tur leh Madrid-a a hlawh aia tam hlawh tura thlem a tum nia sawi a ni a, tun nipui bazarah hian euro maktaduai 150 chu bazar na turin a pe dawn bawk nia sawi a ni.
Ancelotti hian kum 2001-2009 chhung khan AC Milan a lo enkawl tawh a, Serie A title vawi khat a chawi pui bakah UEFA Champions League-ah vawi hnih a champion pui a, Club World Cup a chawi pui bawk.
Hetih lai hian AC Milan coach hnathawk mek Filippo Inzaghi chuan Milan enkawl chhunzawm zel a la inbeisei thu a sawi a, match 39-a enkawla vawi 13 chiah Milan chakpui theitu chuan, "Inbiakna engmah kan la nei lo a, Milan-ah hian cham chhunzawm zel ka la inbeisei a ni," a ti.