English Premier League Gerrard-a'n goal a khung; Liverpool mualphona a khuh zo lo
Liverpool captain Steven Gerrard-a'n Liverpool tana a match hnuhnung ber a khel a, goal khung mah se an team mualpho tur a chhanhim zo lo.
Pathianni zan khan Stoke City khelmual Britannia Stadium-ah Liverpool an leng lut a, kum 52 chhunga an lama goal ruk a luh hmasak ber ṭum tawngin rin loh zawk Stoke City lakah 1-6 in an mualpho. Liverpool hian season tharah Europa League third qualifying round an khel ang.
Stoke-in goal an sur tir
Inkhel ṭan aṭanga minute 22 na lekah Stoke City tan Mame Biram Diouf-a'n goal hmahruai a khung. Liverpool an insiamṭhat hma in Diouf bawk a lo lang leh a, minute 26 naah a goal hnihna a khung.
Mual neitu Stoke-in goal khung an intihhmuh a, Jonathan Walters, Charlie Adam leh Steven Nzonzi te'n goal khung ve lehin chawlhlawk an hman meuh chuan 5-0 in Stoke-in hma an hruai.
Second half-ah Liverpool tan captain Steven Gerrard-a'n an mualpho lutuk tur khuh nan goal a khung a, Liverpool tan match 710 a khelha goal 186 a khungna chiah a ni. Mahse, Stoke tan Liverpool striker hlui Peter Crouch chuan rawn tauh lut ve lehin Premier League-ah goal 47 a tauh luhna chiah niin EPL-ah ani aia goal tauh lut hnem an la awm lo.
Rodgers-a dinhmun a chiang lo
Kar hmasa lawka Liverpool-a a dinhmun a him thu sawitu Reds manager Brendan Rodgers chuan club neitu te'n bang tura an duh chuan a ban tur thu a sawi.
Season thum Liverpool a enkawl chhunga eng trophy mah la chawi lo Rodgers chuan, "Liverpool nena inzawmna nei tawh phawt chu kan result vang khan kan zak ngawih ngawih a ni. Heti chung chung hian club tan tih theih tam tak ka la neiin ka hria," tiin a theih hram chuan Liverpool-a cham chhunzawm zel a la duh thu a sawi.
Kum 42-a upa Rodgers chuan, "Nikuma kan khelh ṭhat lai kha chuan kan lamah fan te an ṭang vek a, tun kumah erawh a dang ta. Second half kan khelh kha chuan fan te an thinrim em em tawh a, an thinrim kha a awm ngawih ngawih bawk. Ngaihdam dil an phu a, kan result vanga mawhpuh tur chu keimah a ni," tiin an chaklohnaah chuan mawhphurtu a nih thu a sawi.
Liverpool hi British media ṭhenkhat chuan Borussia Dortmund manager Jurgen Klopp nen an sawi zawm der tawh.
Lampard thlah zanah City chak
Steven Gerrard ang tho a season thara MLS lam pan tur Frank Lampard chuan Premier League-a a game hnuhnung ber Pathianni zan khan a khel a, goal khat khungin a team a chakpui.
Etihad Stadium-a inkhelah hian Chelsea midfielder hlui Frank Lampard chuan minute 31 naah Manchester City goal hmahruai a khung a, Premier League bika goal 177 a khungna a ni. Minute 88 naah Sergio Aguero chuan goal khat khung ve lehin Manchester City-in 2-0 in Southampton an hneh a, pahnihna nichungin season an khar.
Chelsea legend Frank Lampard hi minute 75 naah lakchhuah a ni a, fan te'n ding chungin an zahna an lantir.
Season thara Europa League khelh tum Saints tan beisei a la bo lo, FA Cup-ah Arsenal-in Aston Villa an hneh chuan Europa League an khel thei dawn a ni.
Spurs tan Kane bawk
Tottenham Hotspurs-in khualmualah Harry Kane goal thun hmangin Everton 1-0 in an hneh a, season tharah Europa League an khel ang.
Tun season-a Premier League player langsar ber pawl Harry Kane hian tun season inelna hrang hrangah goal 31 a khung tawh a, Premier League bikah goal 21 a khung bawk.
English striker Kane hma hian Tottenham player zingah season khata Premier League goal 21 khung thei an tam lo. Teddy Sheringham, Jurgen Klinsmann leh Gareth Bale te chiahin season khatah goal 21 an lo khung tawh a, football khawvela hming langsar tak tak zingah Harry Kane-a'n a hming a nem kai ve ta.