India Premier League Mumbai Indians an champion

Pathianni zan khan Eden Gardens, Kolkata-ah India Premier League final khelh a ni a, Mumbai Indians-in Qualifier 1-a an lo hneh tawh Chennai Super Kings chu run 41 -a hnehin an champion.

Final kalkawng

India Premier League group stage khelh zawh a nihin table-ah Chennai Super Kings an sang ber a, an hnuaia awm chu Mumbai Indians an ni.

Qualifier 1-ah Mumbai Indians-in group stage-a an tluk loh Chennai Super Kings an hneh a, final an lut. Chennai-in Qualifier 2 an khelh a ngaih phah a, eliminator round-a Rajasthan Royals hnehtu Royal Challengers Bangalore chu qualifier 2-ah an tum a ngaih phah.

Chennai-in qualifier 2-ah Bangalore an hneh a, final-ah an hneh loh hnu Mumbai Indians hmachhawn tura inhlangkaiin phuba lakna hun ṭha an nei.

Inkhel chu

Mumbai Indians bat hmasa zawkah an ṭang a, Lendl Sim­mons leh captain Rohit Sharma te an che ropui. West Indies batsman Simmons-a'n ball 45 a hmachhawnah run 68 a vawchhuak a, a opener pui Parthiv Patel erawh final-ah a che 'zero'. Run siam miah lo in a out. Mumbai tan captain Rohit Sharma-a'n a nau te tan innghahna tham a nihzia tilangin ball 26 a hmachhawnah run 50 a vawchhuak bawk.

Ṭum danga che ṭha ṭhin Chennai Super Kings bowler te an che hleithei lo a, Mumbai Indians batsman te'n an sawisa a ni ber. Mumbai hian over 20-ah run 202 tehmeuh an hlapchhuak a, mi panga an hloh.

Chennai bat hun a thleng a, ball 48 a hmachhawna run 57 vawchhuaktu Dwayne Smith che ṭha viau mah se batsman dang te'n an thlawp ṭha tawk lo. Over 20-ah run 161 an vawchhuak hram a, mi pariat hlohin run 41 zetin an target an umpha lo.

Mumbai bowler zingah Mitchell McClenaghan a che ṭha fal a, New Zealand bowler hian run 25 chiah pe in wicket thum a la.

Mumbai Indians captain Rohit Sharma record a chhuan­awm. Captain nichungin vawi hnih IPL final a khel tawh a, a champion ve ve.