Chamberlain-a'n FA Cup final a khel thei ang - Wenger
Arsenal Manager Arsene Wenger chuan a midfielder Alex Oxlade-Chamberlain chu May 30 a FA Cup final Aston Villa nen an khelh hunah a inlan thei tur thu a sawi.
English midfielder Oxlade-Chamberlain hi March thla aṭang khan a ṭha leh malpui thana vangin a inkhel thei lo char char a, Premier League match hnuhnung bera Arsenal-in West Brom 4-1 a an hneh ṭumin a inlan leh thei tawh thung.
French manager Wenger chuan Inrinni a Villa nen finalan khelh tur thlirin, "Inkhel bul ṭana minute 90 khel tur chuan ala ṭha tawk lo maithei, mahse inkhel leh tur chuan a inpeih tawh. A lo berah ngaiawh leh tur chuan kar khat tal a inbuatsaih ala ngai ang," tiin a sawi.
Pathianni zana Premier League kharna inkhelah Arsenal hian an khelmual Emirates Stadium-ah an mikhual West Brom chu Theo Walcott hat-trick leh Jack Wilshere goal khat thun hmangin 4-1 in an hneh a ni. Tun season-ah inhliam vangin Walcott hi a inkhel tam lo hle a, March thla hnua inkhel bul a a ṭan leh na hmasa ber a ni nghe nghe.
Arsenal hian EPL-ah point 75 hmuin pathumna ni chungin season an khar a, champion Chelsea chu point 12 in an phak lo. Pathumna an nih avangin Arsenal hian season tharah Champions League qualifying an khelh a ngai lo ang.
Hetih lai hian Aston Villa manager Tim Sherwood chuan a first-choice goalkeeper Shay Given chu FA Cup final-ah a chhawr theih tawh tur thu a lo sawi ve bawk. Villa hian an goalkeeper Given hi a ṭhal na vangin an chhawr thei lo reng a, tunah chuan a dam ve leh tawh a ni.