Toure leh Milner an chhuah ka ring lo - Pellegrini

Manchester City manager Manuel Pellegrini chuan a midfielder pawimawh pahnih Yaya Toure leh James Milner te chuan City an chhuahsan a rin loh thu a sawi.

Kar tawp inkhelah City hian an khelmual Etihad Stadium-ah an mikhual Southampton chu 2-0 in an hneh a, he inkhelah hian Toure leh Milner te hian inkhel bul an ṭan ve ve. Mahse, inkhel tawp hmain thlak ve ve an ni thung. Hei vang hian an chhuak tur a thu thang lo awm chuan sawi zui a hlawh phah hle.

Toure hi club lian hrang hrang nen sawi zawm a nih bakah Roberto Mancini-a'n Inter Milan-ah a hruai dawn niin an sawi nasa hle. He tih lai hian Milner-a contract neih lai pawh hi June thla khian a tawp tawh dawn avangin contract thar a ziak lo a nih chuan a chhuak ngei ang.

Hetianga an player pawimawh pahnihte dinhmun a chian loh lai hian Pellegrini chuan, "Kan player zingah season thara chhuak tur chiang sa chu New York City a kal tur Frank Lampard chauh a ni. Tuore kha hliam damkawr a nih avangin a inkhel tluan thei lo mai a ni a, ani bakah Milner pawh kha a khupah an pet sak avangin a inkhel tluan thei lo bawk. Kan thlak avang khan club an chhuahsan dawn tihna a ni chuang lo, season tharah helai hmunah hian an la awm ngei ka ring," tiin a sawi.