Golden Boot dawn chak Luca Toni

Hellas Verona striker Luca Toni chuan Serie A golden boot a dawng thei a nih chuan a tan chawimawina ropui tak a nih tur thu a sawi.

Season thara Aus­tralia A-League lama khel tur anga an sawi Toni hian Pathianni a Parma an inhnehtawk pui ṭumin goal hnih a khung a, tun season Serie A-ah goal 21 thun tling tawhin a aia goal khung hnem an awm lo. Amah hnaih bertu Inter Milan striker Mauro Icardi leh Juventus chhuanvawr Carlos Tevez te chuan goal 20 ve ve an khung a ni.

Kum 37-a upa Italian striker chuan, "Top scorer ka nih theih chuan a lawmawm khawp ang. Keima mimal bakah team tan pawh chanchin lawmawm tak a ni dawn a ni. A chhan chu top scorer awmna team hian an khel ṭha thawkhat tih a tilang dawn a ni," a ti.

Fiorentina aṭanga Verona a zawm hnua season hnih chhung goal 41 thun thei Toni chuan, "Hellas Verona player hi Serie A-ah top scorer an la ni ngai lo a, golden boot hi ka dawng thei hlauh a nih chuan club tan pawh chanchin lawmawm tak a ni dawn a ni," a ti.

Pathiannia Parma nen an inkhelh ṭumin Toni hian min 42-ah a tauh luh mai bakah minute 80 naah penalty aṭangin a pet goal bawk. Season thara Serie B lama khel tur Parmaa nen hian 2-2 in an inhnehtawk a ni.

Kar hmasa khan Australia media te chuan Toni hi A-League club Adelaide United zawm tur angin an sawi a, kum 2012-a Sydney FC zawmtu Alessandro del Piero hnungzuiin Australia lamah hlawh­tlinna zawn a tum nia sawi a ni.