Mercedes-in Hamilton ngaihdam an dil

Pathianni khan Formula 1 Monaco Grand Prix tlan a ni a, test drive-a a tlan ṭhat avangin Mercedes driver Lewis Hamilton chuan pole position aṭangin intlansiak bul a ṭan. Mahs, a tawpah a tem-mate Nico Rosberg leh Ferrari driver Sebastian Vettel hnungah a thleng. Hamilton pakhatna nih loh chhan hi a team-in a hun loa motor ke thlak tura an tih vang a ni a, hei vang hian Mercedes chuan an driver lakah ngaihdam an dil.

Intlansiak ṭan tirh aṭang bul ṭan ṭha Hamilton chu pakhatna a ni leh ngei dawna a lan laiin intlansiak tawp dawnah Toro Rosso driver Max Verstappen chetsual vangin intlansiak tlan kawngah safety car a rawn lut. He milai hian Hamilton chu a motor ke thlak tur a tih a ni. Hamilton-a'n a motor ke a thlak chhung hian motor ke thlak ve lo a team-mate Rosberg leh Ferrari driver Vettel ten an lo tlan pel hmana, a tawp thlengin a um phak tawh lo. A zawna a vawi thum nan Rosberg hi Monaco Grand Prix-ah pakhatna a ni ta.

Mercedes Formula 1 boss Toto Wolff chuan, "Kan tih sual liau liau a ni e, a chang chuan kan beisei loh danin thil a thleng ve ṭhin a, France-ah pawh khan duhthlanna kan hmang sual hle. Motor ke thlak lo khan a tlan tluan thei awm tho si a, safety car a rawn luh tho avang khan Lewis khan hma a hruai tlang thei turah kan ngai. Mahse kan hun hman dan kan chhut dik tawk lo a ni. Hamilton hi driver ṭha leh puitling ve tawh tak a nih avangin tihsual palh a awm ve thei a nih tih chu a hriatthiam kan beisei," tiin a sawi.

Kum 29 a upa Rosberg chuan, "Lewis kha pakhatna ni tur a ni a, a dinhmunah ka indah chhin khan a na dawn hlein ka hria. Mahse infiamnaah chuan vanneih reng theih a ni lo a, vanduai chang pawh a thleng ve fo bawk. Engpawh nise kan team kan che ṭha a, hnehna ka chan avangin ka lawm hle," tiin a sawi.

Monaco Grand Prix result avang hian driver World Cham­pionship-a point 126 hmua hma hruaitu Hamilton leh Rosberg inthlauhna a tlem sawt a, point 10 chauhin an inthlau tawh.